Chef Matt Bolan & Chief Engineer Ramon Avila Perez ta retira for di Hilton

Hilton Aruba Caribbean Resort & Casino a host un celebracion informal pa veterano culinario Chef Ehecutivo, Matt Boland y Director di Ingeniera, Ramon Avila Perez.
Ambos Boland y Avila Perez lo ta tumando nan añanan di experiencia y conocemento, aplicando esaki awor na nan metanan personal.

Chef Ehecutivo Boland lo ta apoyando su yiu Mikey na sigui cu su aspiracion culinario, y Avila Perez lo reuni cu su famia na su pais nativo y su hogar Puerto Rico.

Cu training extensivo den cushinanan clasico Frances na Paris, Matt Boland su reconocementonan mundialmente premia y creatividad a haci cu el a logra haya y domina trabao di Chef Ehecutivo na algun di Aruba su resortnan di mas grandi, birando popular na un nivel di celebridad di chef na Aruba. E ta comparti cu e tabatin e privilegio di traha hunto cu Grande Dame di Palm Beach pa ocho aña bao di e bandera di Radisson y pa mas cu tres aña como hefe di e brigada culinario di Hilton.

Bao di su direccion, e resort su famoso steakhouse, Sunset Grille, a bira un AAA Four Diamond restaurant, un di solamente dos restaurant cu a ricibi e reconocemento aki na Aruba. Matt Boland a cushina n’e prestigioso James Beard House na ciudad di New York,  “un ‘career milestone’ pa cualkier chef,” e ta bisa, anto a sigura e status di Hilton Aruba su restaurant como un faborito di nos bishitantenan cu ta ripiti nan biahe.

Chief Engineer Avila Perez a wordo contrata internacionalmente pa bin y traha na Aruba, anto durante su tempo riba e isla – casi cuater aña – el a enamora cu e lugar y e miembronan di e team.

Segun General Manager, Vasco Baselli, Avila Perez ta ‘lagando e Grande Dame den un tremendo condicion’, mas fresco y mas bunita, por medio di a upgrade y renoba hopi sistema y procedura dunando e resort iconico aki un bida nobo.

Den su despedida, Avila Perez a expresa un placer enorme den por laga su tan stima departamento di ingenieria den man di un hende muher bon califica, Nephtaly Croes, kende lo ta encarga cu e departamento su actividadnan di awor pa dilanti. Nephtaly t’e resort su prome persona femenino pa lidera e departamento di ingenieria.

Ambos gerente di departamento cu ta retirando a wordo presenta cu bouquet fresco di flor, cartanan di aprecio y regalitonan na un encuentro chikito cu distanciamento social na Mira Solo Lobby Bar, den presencia di nan coleganan hefe di otro departamentonan Glenn Farro, Director di Recursonan Humano, y Vasco V. Baselli, General Manager.


Ambos Farro y Baselli a agradece Boland y Avila Perez pa nan añanan di servicio, y desea nan tur cos bon na caminda pa nan aventuranan nobo, liber pa disfruta di e fruto di nan labor, yiunan, nietonan y nan hobbies.

Baselli a papia pa henter e team. “Mi lo kier expresa nos gratitud sincero p’e trabao duro y profesionalismo cu bo a demostra durante ultimo añanan na nos estimado hotel,” el a bisa. “Bo compromiso y dedicacion semper tabata un inspiracion pa bo coleganan, supervisors y managers, kende sigur lo haya falta di traha cu bo.

Durante bo tempo na nos hotel, bo a biba y mira diferente cambio y retonan, anto semper a sa di surpasa esakinan na mes momento haciendo mas di loke nos bishitantenan ta spera. Bo ta representa loke semper a defini e resort aki, e hospitalidad caluroso y autentico di su miembronan di team. Awor cu bo ta inicia un etapa nobo den bo bida, nos ta duna bo pabien, anto ta desea di extende un masha danki di curason, pa un tremendo trabao bon haci.”

Den e imagennan abao, por mira algun momentonan durante e encuentro cu bebidanan y hors d’oevres na Hilton Aruba, cu despedida na Boland y Perez Avila.