Fundacion di CIBC FirstCaribbean International Bank ComTrust ta sostene Filomena College Mavo cu inovacion p’e studiante

CIBC FirstCaribbean International Bank su sector caritativo “Comtrust Foundation” ta aporta un bes mas n’e comunidad Arubano. A toca turno na sector di educacion na Aruba en especial Filomena College Mavo. Despues di a ricibi un carta for di directie di scol, ilustrando e area nan cu nan mester ayudo, e team di Aruba a opta pa yuda nan den e area di inovacion segun sr. Giovanni Atencio, Country Head di CIBC First Caribbean Aruba. 

Durante e bishita na scol sra. Raquel Lampe, Cabezante di Filomena College Mavo a comparti: “Mirando cu ta practicamente 2 aña sin por a organisa fundraising manera ta custumber, scol a tuma initiativa pa aserca compania nan. E necesidad di move cu e tempo actual p’asina hisa e calidad di eduacion ta uno importante y cu no ta pasa n’e manera facil y rapido desea”.

Pa cu esaki Filomena College Mavo a ricibi smart TV’s p’asina brinda e studiante nan les nan mas avansa y placentero. Vak nan manera Spaans, Nederlands, Engels y  tambe Wiskunde tabatin urgencia di inclui tools nan mas avansa ora di duna les, segun Juffrouw Oduber.

Por a nota durante bishita e entusiasmo y alegria cu e studiante nan ta sinti awor cu nan smart TV den les. Maestronan tambe a splica cu awor cu un tool inovativo manera esaki por nota cu particpacion di cada studiante durante e les ta uno mas activo.

Den un mainta ameno a haya rondleiding di e scol y por a mira con ta haci uzo di e smart TV nan. Tambe a comparti cu pa por logra haci tur vak y lokaal inovativo Filomena College Mavo ta depende di mas donacion manera esun recibi awor.

Sr. Atencio tabatin e oportunidad di duna palabra di pabien n’e studiantenan cu nan smart TV y tambe comparti e mensahe “Ta importante pa caba cu bo studio cu ta un logro cu ningun hende por kita dibo” .