Gijsbertha buskando mihó areglo di retiro posibel

WILLEMSTAD – No tin ehempel komparabel kon miserabel un persona ku a bin ta okupá un profeshon respetuoso i di kategoria komo empleado di un banko komersial, a sintié ora e momento fatal yega ku a yega e momento final i terminal di su karera.

Esei t’e kaso e dianan aki kaminda no tur, pero un gran parti di trahadornan di Girobank a haña notifikashon di retiro ku ta kai bou di kordinashon di Banko Sentral di nos pais.

Fuentenan anonimo den seno dje banko a sirkulá un mensahe indikando ku un grupo di empleado di Girobank ta hopi rabiá ku Minister di Finansa Kenneth Gijsbertha, kende nan ta akusá di a gaña nan riba e kondishonnan pa baha ku retiro i ku ta serka fuentenan den Banko Sentral nan a tende esaki.

Reportadamente Minister Gijsbertha lo a priminti nan ku nan lo risibi 9 luna di pago ora Girobank sera definitivamente, pero siman pasá ora ku gerensia dje banko a hasi kuenta final, nan a haña solamente tres luna di pago huntu ku nan Cesantia.

Esaki ta loke fuentenan na CBCS a bisa e personal di Girobank. E motibu ta ku Gijsbertha lo a primintí nan ku nan lo risibí nuebe luna di pago ora Girobank sera definitivamente. Siman pasá a resultá ku e empleadonan a haña solamente tres luna di pago huntu ku nan cesantia.

Segun e fuentenan na CBCS, Minister Gijsbertha tabata sa ku e lo no por kumpli ku e promesa aki, pero tòg a hasi esaki durante kampaña pa elekshon ora el a primintí tur kliente ku nan lo haña nan plaka bèk.

E empleadonan di Girobank ta rabiá, awor ku Gijsbertha a kumpli ku e klientenan sí, pero no ku nan.

GIJSBERTHA NO T’ADEN

E informashon aki t’asina pisá ku nos a buska i haña kontakto ku Minister Gijsbertha, pasobra e detayenan tabata zona inkreibel i e mandatario mesora a refutá tur e detayenan ku personal di Girobank lo a haña tende na Banko Sentral.

Minister Gijsbertha a splika ku e no a sinta ku ningun delegashon di trahador d Girobank ounke insidentalmente e tabatin kombersashon ku algun riba un base individual.

Su envolvimentu ku Girobank i e retironan ta ku ora Girobank a pidi retiro dje personal na SOAW, el a pidi pa haña e plan sosial i ora el a mira esaki, el a bisa e direktor interino pa mand’é bèk i prepara un plan ku ta por lo menos mes bon ku e plan dje anterior grupo ku a haña retiro.

Esei pasobra e anterior plan tabata mihó ku esun ku e resiente grupo a haña.

Ne momentonan aki tin 109 empleado cu mester baha pero di kual sigur mitar lo keda te por lo menos mart 2022 pa gradualmente nan baha despues di 3, 6 of mas luna pa kaba di likidá  manera traha relato finansiero anual.

I ora yega asina leu mes ku no por sigi ku tantu personal nan tin ku duna nan opzegging den kual tin tur garantia inkorporá ku ta respetá nan derechonan.

I hasta asina ora ku a likidá Girobank, lo keda un desena di empleado den servisio dje organo nobo GI-RO pa ofrese servisionan esensial.

KLIENTENAN

Ayera mainta Banko Sentral a anunsiá ku pago di depositonan di klientenan di Girobank N.V. via GI-RO Settlement Holding N.V.

Nan lo sòru pa pago di deposito i saldo di klientenan di Girobank N.V..

E siman aki a eliminá e limite ku klientenan por a lanta for di nan kuenta i klientenan ku tin basta sèn por lanta  1.2 mion florin pa kliente i despues ku nan regla kuenta di debe ku nan tin ku e banko.

Esei ta nifika ku e klientenan por dispone di  nan plaka te ku e montante di 1.2 mion florin. I finalmente ta pidi klientenan pa usa komunikashon online mas tanto posibel.

Por bishita Girobank solamente despues di traha sita.