Hopi destruccion den cas, un dama maltrata y un homber a keda deteni pa maltrato y destruccion

Diaranson den careda di 11’or y 45 di mainta, presencia di Polis a wordo pidi cu urgencia na un cas na Wayaca, pa un problema di famia cu tabata saliendo for di man.

Varios unidad di Polis a bay mesora n’e cas, na yegada enberdad for di pafo di e cas caba nan por a scucha discusion y gritamento basta fuerte. Casi tur bentana di cas a wordo destrui y tambe den e cas varios destruccion a wordo cometi.

Polis y Recherche cu a yega prome n’e cas a core bay paden pa evita mas problema, den e cas e Polisnan a bin topa cu un dama herida y a pidi pa presencia di ambulance. Tambe nan a topa cu un homber, kende lo tabata e agresor, mesora el a keda detene y e Polisnan a pidi pa un transportwagen.

Rapid Responder tambe a wordo pidi n’e sitio, pa atende cu e victima y e homber cu tabatin un herida na su man, esaki tabata sangrando. No tabatin necesidad di transporta niun di dos pa hospital.

N’e cas a pidi pa presencia di Departamento Tecnico pa saca potret di e cantidad di destruccion cu a wordo cometi n’e cas y e heridanan cu e victima a ricibi for di su agresor.

E agresor a wordo hiba cu transportwagen pa Warda di Polis. Presencia di slachtofferhulp a wordo pidi pa atende cu e victima.