Marisol Lopez Tromp a confirma cu e ta lider di MAS pa eleccion

Algun ora despues cu AWEMainta a publica cu Marisol Lopez Tromp lo encabesa lista di partido MAS, den oranan di ayera merdia e politico mes a confirma esaki pa prensa ora cu el a caba di sali for di Camara di Comercio.

Ta for di fin di siman caba AWEMainta a ricibi e informacion cu drs. Marisol lo bay haci uso di e plataforma politico di partido MAS usando e mesun procedura cu Lisette Malmberg a opta p’e pa bay cu su movimiento politico nobo, cu ta Transforma, cu PPA.

Mirando cu eleccion a wordo adelanta cu tres luna ora cu Evelyn Wever Croes a baha su Gobierno, no a keda tempo pa forma of crea un partido nobo mirando tur e procedura legal cu tin cu tuma lugar prome cu esaki bira oficial.

Den eleccion di 2017 partido MAS a wordo encabesa pa Holmo Henriques y e partido a logra haya solamente 287 voto y como lider Henriques a haya mas cantidad di voto cu tabata 127 voto personal.

Drs Marisol Lopez Tromp den eleccion di 2017 como candidato number tres riba lista di POR, a mira pa prome biaha den su carera como politico, cay bou di mil voto logrando solamente 497 voto personal, pero despues di a wordo baha como Minister pa Gabinete Wever Croes, hunto cu denuncianan di actonan coruptivo di su antecesor Otmar Oduber y kisas algun otro Minister di e Gabinete, Lopez Tromp a cana hopi simpatia den pueblo y awor e lo participa cu su di cuater partido den un proceso electoral.

Mientrastanto partidonan ta sigui busca candidatonan pa traha un lista representable p’asina trata di haya mas tanto voto posibel y cantidad di nomber ta ser menciona pero sin cu tin confirmacion di esaki.

Loke si AWEMainta a bolbe haya informacion ariba, ta desaroyonan cu e lista di MEP caminda lo tin basta demanda di politiconan nobo y esnan cu ya a participa na ultimo eleccion, pa haya un posicion den e prome diesnan riba e lista.

Chris Romero, kende tabata number tres riba e lista na 2017, lo no tin e posicion aki mas, pero o wordo baha di posicion despues cu el a duna e impresion cu e lo bandona politica, pero awor cu su Gobierno a cay, e no a logra den esaki.

Informacion extra oficial ta mustra cu Romero tin e chens di keda for di e prome 10 nan riba e lista, pero esaki no por a wordo confirma pa AWEMainta, mientras cu Minister Plenipotenciario demisionario na Hulanda, Wilfred Besaril, tambe ta core posibilidad di lo wordo baha di puesto 6 cu e tabata ocupa pa eleccion di 2017.

Puesto number 9 tambe ta habri mirando cu Daphne Lejuez ya no ta forma parti di MEP mas y p’e ‘vacatura’ aki tambe tin algun trekmento di cabuya den varios candidato, pero por a compronde cu formacion di e lista ta continuando y e posibilidad ta existi cu e puesto ey lo bay wordo ocupa pa Sue-Ann Ras.