No por confia Prome Minister cu a kita medicina for di miles. Haci intento pa kita un proceso electoral cu semper a funciona perfecto

Ayera mainta na salida di su reunion cu Gobernador Alfonso Boekhoudt, e lider di AVP, Mike Eman a cuestiona formalmente e intencion di un Gobierno demisionario, pa impone un cambio den e proceso electoral, cu ta habri caminda pa fraude electoral.

Mike Eman a mustra cu ta sumamente dificil pa compronde e mentalidad di gobernantenan di Evelyn Wever Croes, kendenan ta kitando remedi di nos grandinan, miles y miles di mama y tata n’e momentonan aki, tin cu paga pa nan propio remedi, cu anteriormente tabata wordo cubri pa AZV.

“Miles y miles di hende tin solamente 60% di nan salario, ambtenaarnan cu pa gran parti di loke nan tabatin na entrada y beneficionan y a perde tambe casi 15% di nan poder di compra.

Pueblo di Aruba ta sufriendo bou di e situacion aki, pero si Gobierno tin placa pa bay cumpra scanner.

Ta lanta e pregunta, di kende ta bay cumpra e scannernan aki? Pakico ta bay cumpra scanner, hustamente na un momento cu pueblo ta sufriendo y ta algo totalmente inexplicabel y AVP ta kere cu aki tin hopi cos cu tin cu bay wordo investiga di biaha tambe pa mira kico t’e forsanan tras di e idea aki, kico t’e pensamento tras di e idea aki y e inkietud aki nos a comparta awe cu Gobernador cu ta mustra den nomber di partido AVP, den nomber di e fraccion di mas grandi den Parlamento,  mustrando cu e Gobierno aki ta demisionario y cu e Gobierno aki no tin derecho  pa haci cambionan den un sistema  di eleccion caminda e confiansa den e proceso electoral, ta asina crucial,” di AVP, Mike Eman a declara na salida di e reunion cu Gobernador hunto cu lider di fraccion di AVP, sr. Marlon Sneek.

Sr. Eman a mustra cu for di momento cu Sharina Luidens di Censo a bin duna informacion riba e cambio aki den Parlamento y caminda Prome Minister Evelyn Wever Croes a declara despues cu su persona ta para tras di e intento di fraude electoral aki, esaki pa AVP ta inaceptabel y por sinti cu pa pueblo tambe esaki ta inaceptabel.

E lider di AVP a sigura cu nan lo bringa e asunto aki te na morto, pasobra democriacia di un pais ta algo cu tin cu salvaguardia y AVP lo para firme pa e derecho di pueblo di vota dia 25 di juni, cada voto wordo conta pa anochi Aruba por wordo libera di e Gobierno di mas malo cu el a conoce den historia di e pais aki.