Scouting Aruba ta celebra Dia di San Jorge

Aruba completo ta pasando den momentonan diferente di locual nos ta custumbra cu ne y esaki no ta diferente p’e movemento scout. Continuamente nos ta adapta y ahusta nos maneho y protocol pa sigui percura pa nos movemento por drei na un manera sigur pa nos miembrecia.

Anualmente e movemento scout ta celebra y conmemora Dia di San Jorge (Sint Joris Dag).

Esaki ta tuma lugar awe 23 di april.

Normalmente Scouting Aruba lo tene un evento grandi pa celebra e dia grandi aki den e mundo di scouting, caminda nos lo conta cu participacion di 500 miembro mas nan mayornan y famia, pero lamentablemente esaki no ta posibel den e situacion actual di nos mundo y pais Aruba.

E realidad nobo ta trece cu ne cu nos mester ta hopi cauteloso y percura pa cuida nos famia, amigo y sernan keri. Den e cuadro aki nos celebracion lo ta uno diferente, pa cada scout y cada grupo individualmente. No obstante e realidad actual ta importante si pa nos tene na cuenta y den nos pensamento semper e esencia real di Dia di San Jorge.

Riba e dia aki nos ta recorda e gran guerero cu a bringa contra maldad y persecucion di ciudadanonan inocente pa motibo di nan fe y creencia. Tambe nos ta uza e moraleha di e leyenda caminda cu San Jorge a mata e dragon caminda nos ta educa nos scoutnan pa semper lucha pa locual ta bon.

Semper pone bo dilanti pa ta honesto, responsabel, noble, cumpli cu bo debernan civico y tene bo mes na compromisonan haci den tur cos cu bo dicidi pa haci. Tur esaki como caracteristicanan di San Jorge como e gran guerero pa su pueblo.

Nos fundador di scouting a scoge San Jorge como e patrono di tur scout meramente door di e caracteristicanan ariba menciona. Esaki ta hustamente locual nos fundador a mira como lo necesario pa tur scout pone bista riba dje. Pa nunca rindi den bida, pone bo metanan bo dilanti y bay pa nan, yuda bo prohimo, haci lo corecto y semper cu confiansa lo bo logra bo metanan.

Awe riba dia di San Jorge nos tur como scout esta: Bever, Welp, Verkenner, Explorer, Voortrekker, Lider, Colaborador, Comisario y Dirigentenan Institutional ta renoba nos promesa haci dia nos a instala y tuma e compromiso pa crea un mundo miho, cu paz y husticia.

Conforme nos tradicion, nos ta duna un tarea di dia na tur miembro di Scouting Aruba riba dia di San Jorge. E tarea e aña aki ta hopi simpel: Ban proteha otro lo mas posibel contra e enemigo invisibel cu yama COVID-19. Den union como comunidad di Aruba, ban sigui e protocolnan di salud y corda cu door di cumpli cu esakinan y cuida bo mes, bo ta cuida bo prohimo tambe.

Feliz dia di San Jorge na tur nos miembrecia nacional na Aruba, rumannan scout y guia na Aruba y tur demas scout rond mundo. Celebra cu hopi honor y orguyo nos dia tan special!

Scouting Aruba ta e asociacion nacional (madre organisacion) cu ta coordina e 12 gruponan scout local rond di Aruba. Funda desde 23 di april 2000 actualmente cu 21 aña dirigiendo e movemento na bienestar di nos pais Aruba. E movemento scout na Aruba ta existi pa mas di 90 aña caba y cu bista riba futuro lo sigui brinda scouting di calidad na nos isla basa riba su plan strategico y lidernan cu compromiso y responsabilidad pa guia nos miembrecia.