Tremendo trabou pa trahadornan di DVG p’e proceso cana hopi facil

E proceso di vacunacion ta continuando y p’e proximo fin di siman, ta intencion di efectua mas tanto vacunacion posibel pa tur hende,  cu ta bin na remarca p’esaki.

Mientras cu na inicio tabatin algun contra tiempo cu e proceso, por a tuma nota cu segun e dianan ta pasando, henter e sistema di vacunacion ta bayendo hopi bon mes, cu hendenan trankilo, mientras cu e trahadornan di DVG, ta haciendo un trabou sublime.

Tanto p’e gruponan cu ta bin tuma nan prome inyeccion como p’esnan cu ta bin busca nan di dos vacuna, por a tuma nota cu e proceso ta canando den un ambiente hopi positivo.

Aki y aya por tin algun iritacion di hendenan cu kier drenta sporthal, sinta y haya e vacuna suministra mesora, pero di mas c’un persona por sinta warda p’e ricibi e vacuna, por ta 15 pa 20 minuut, pero den mayoria di cas esaki no ta pasa 15 minuut.

Hopi hende kier tuma e vacuna y lanta bay cas mesora, pero ta rekeri un proceso pa keda sinta pa 15 minuut prome cu e persona por bandona sporthal, pero esaki ta  algo cu e compania cu ta suministra e vacunanan aki, ta pidi mirando cu lo por tin hende cu por sinti nan mes marea p’e inyeccion of cualkier otro cos.

Pero en realidad e proceso  ta canando hopi bon, e parti di hygiene ta hopi bon, caminda ta limpia tur stul asina c’un hende por bay su cas, mientras cu tin oficialnan di DVG ta dirigi e trafico den tremendo forma.

E trato ta hopi social y sin duda por a mira cu e proceso ta hopi calmo mes y ta bayendo den bon direccion.

E fin di siman aki lo habri cuater centro di vacunacion caminda DVG lo kier suministra mas tanto vacuna cu por ta posibel p’asina yega na un etapa caminda practicamente casi henter pueblo lo ta vacuna.