Aruba Aloe ta Real awor

Diahuebs dia 22 di april 2021, Aruba Aloe a ricibi e certificado y e Decreto Real for di nos Gobernador di Aruba, señor Alfonso Boekhoudt, cual ta pertenece n’e Predicado Real (Predicaat Koninkljk) otorga pa su Mahestad Rey Willem-Alexander n’e compania Arubiano Aruba Aloe Balm NV.

For di awe, Aruba Aloe mag di añadi e Titulo Real na su nomber y e Corona Real na su logo. E adicion aki ta simbolisa e respet, admiracion y confiansa di e Rey p’e compania cu ta ricibi’e. Un di e condicionnan pa un compania por ricibi e honor aki ta cu e mester tin un importancia nacional y e mester existi por lo menos 100 aña.

Na 1890 Cornelis Eman a cuminsa cu e comercio di Aloe Vera, despues di cual Casey Eman, Jani Eman y finalmente señor Henny Eman a continua cu e negoshi. E famia Eman a caba ta dirigi e compania pa 110 aña y a transforma e compania di un empresa comercial den un compania cu ta bende producto pa cuido personal na unda e uzo di 100% gel puro di Aloe Vera cosecha di e camponan Arubiano, semper tabata central.

Na aña 2000, señor Louis A. Posner a tuma e encargo di e compania for di señor Henny Eman y a inverti pa desaroya e compania na nivel internacional y pa engrandece e “footprint” di e compania localmente. Na 2014 señor Onno Jr. van Romondt a uni su mes na e compania como e di dos accionista p’asina hunto nan sigui expande Aruba Aloe.

Mientrastanto, Aruba Aloe tin 15 tienda riba nos isla y productonan traha den e fabrica ta wordo exporta pa mas di 55 pais rond di mundo y ta wordo bendi den mas cu 15,000 tienda na Merca. Tur esaki for di e facilidad di produccion Arubiano na Hato.

Managing Director Remko van der Veldt ta comparti: ”Esaki ta un momento historico pa Aruba Aloe y pa Aruba. Ta haci nos sumamente orguyoso, cu Aruba Aloe t’e prome compania den e parti Caribense den Reino cu a ricibi e derecho di su Mahestad Rey Willem- Alexander di por hiba e Predicado Real. P’esaki tambe nos kier agradeci en especial nos Gobernador di Aruba, como representante di e Rey, pa otorga e derecho pa por hiba e Predicado Real.”

Sr. Van der Veldt ta continua: ”Den e ultimo 130 aña e compania a enfrenta “ups-y-downs”, pero cu pasion, compromiso y orguyo Arubiano, semper nos tabatin e pleno conviccion cu Aruba Aloe tin un gran futuro su dilanti. E conviccion aki tabata presente serca tur e generacionnan Eman cu a dirigi e compania, tur e empleadonan cu a yega di traha n’e compania durante e añanan, como serca e doñonan y empleadonan actual!”

Cu e Predicado Real Aruba Aloe ta forma parti di un grupo di compania cu ta carga e Titulo Real manera Shell, KLM, KPN y e Real Schiphol Group, pa menciona algun ehemplo.

E doño Louis A. Posner ta bisa tocante di esaki: ”Ta un honor pa para banda di e compania grandinan aki. Nos kier demostra cu e compania Aruba Aloe, un compania (di un isla chikito) por bira un empresa cu ta opera globalmente.

Tempo cu mi a tuma encargo di e compania na aña 2000 mi a discribi esaki den e siguiente manera; Locual Coca Cola ta pa Merca y Heineken pa Hulanda, Esey ta locual Aruba Aloe lo mester bira pa Aruba”.

Naturalmente nos mester celebra e momento historico aki na grandi. Van der Veldt: “Nos lo bay celebra e fiesta aki cu nos clientenan y Aruba mas laat den e aña, ya cu e situacion actual pa cu Covid-19 y su medidanan corespondiente ainda ta na vigor. Na su debido tempo Aruba Aloe lo manda un comunicado tocante di esaki.”

Pa clausura Van Der Veldt ta bisa: ”Desde awe nos no ta Aruba Aloe mas, pero nos ta “de Koninklijke Aruba Aloe”, un compania orguyoso Arubiano”.