Caso Avestrus ta dirigi pa sa e proceso di otorgamento di tereno erfpacht

E investigacion Avestruz ta den full swing. Landsrecherche a detene cinco sospechoso den e ultimo dos simannan aki relaciona cu e investigacion di posible delitonan di corupcion y otro hechonan castigable rond di otorgamento di terenonan di Gobierno, segun un comunicado di Ministerio Publico.

E sospechosonan aki ta envolvi na diferente manera den e investigacion. Dos di nan a wordo poni den libertad mientrastanto, pero nan ta keda sospechoso den e caso.

Avestruz ta dirigi riba e pregunta si un of mas compania a sa di obtene (un opcion riba) derechonan di erfpacht di kavelnan di pais Aruba a base incorecto durante e añanan 2009 te 2017. E eventual rol cu un ex-Minister a hunga den esaki tambe ta wordo investiga. No ta exclui cu lo bin mas detencion, segun Ministerio Publico.

Mientras ayera un di e sospechosonan su detencion a keda prolonga cu 8 dia mas y a ser manda pa KIA. Ta trata aki di Leoncita Arends.