Entrante dialuna awor Gobierno ta flexibilisa medidanan

Ayera mainta, Prome Minister Evelyn Wever-Croes, a anuncia cu a yega n’e decision pa flexibilisa algun regla cu tabatin di Covid. Por a mira te cu diahuebs, tin 350 caso activo, cu ta halto ainda. Pero si compar’e cu dia 1 tabata 704. A logra baha e casonan activo.

Ainda tin un averahe di 36 caso nobo pa dia. E riesgo t’ey ainda, e mandatario a enfatisa. Pero ta bayendo den bon direccion. Si mira situacion den hospital, tabatin 39 pashent den hospital y 15 den intensive care. Tabatin 95 hende a fayece di Covid, cual sigur ta keda lamentabel.

Pa flexibilisa no t’esey so ta mira. Ta mira tambe e situacion di e vacuna. E sistema pa vacuna ciudadanonan ta bayendo hopi bon. Te cu ayera tabatin 45 mil persona cu a vacuna. Cu ta mas of menos 54% di nos poblacion cu kier yega na vacuna.

Ora cu ta mira cu e cifranan ta bahando di casonan nobo, hospital su situacion tin poco menos presion y vacunacion ta bayendo bon, lo cuminsa flexibilisa.

FLEXIBILISACION DI MEDIDANAN

Entrante dialuna ta cu orario di seramento lo ta 10’or, na lugar di 9’or di anochi. Pues e ta hala cu un ora mas leu.

Toque de Queda ta bira 11’or, na lugar di 10’or di anochi. Pa loke ta gebiedsverbod, esaki tabata 7’or di anochi, awor ta 7’or y mey di anochi. Cu gymnan ta habri bek dialuna segun protocolnan estricto. Tambe ta permiti atrobe drive-by y drive-thru.