Hobencito turista herida despues di a accidenta cu UTV pariba di Bushiribana

Diabierna mainta den careda di 11:30, 911 a haya informacion di un accidente mas cu UTV pariba di Bushiribana direccion Natural Bridge. Ambulance y Polis a wordo poni na altura y a sali direccion p’e sitio indica.

Na yegada di Polis, nan a constata cu ta un hobencito di mas o menos 13 pa 14 aña t’esun herida. Mesora a pidi pa ambulance, aunke esaki ya tabata na caminda. 

Na yegada di ambulance, nan a atende cu e mucha homber y un otro mucha muher kende a ricibi algun rasca. Paramediconan a opta pa hiba e mucha homber Hospital, unda cu nan lo por controla e golpinan cu el a ricibi na su frenta y wowo.

Por bisa cu casi tur siman tin accidentenan cu sea quadracer of utv’s y mayoria ta cu turistanan. E mesun patronchi, cu durante cu nan ta bay off road nan ta bay haci maniobranan cu ta salinan caro.

No ta conoci si esnan cu ta huur/rent e vehiculonan ta papia of duna e turistanan un folder pa mustra nan e peligernan di e aparatonan aki ora bo haci maluso di nan.