Leak di gas a causa explosion, dos dama a resulta herida

Diahuebs anochi algo prome cu 8:30, alarma a wordo bati pa un explosion na un cas situa na Calbas Plaza Residence. Esaki ta casnan di Aruba den e bocht cu ta bay pa Kudawecha. Mesora Bomberonan, ambulance y polis a sali direccion e cas.

Na yegada di Polis, Brandweer y tambe ambulance tabata ya n’e sitio. Polis na su yegada a wordo informa cu un dama a bay cende un forma, y esaki a explota. Pues segun informacion lo tabata trata di un leak di gas debi cu esaki tabata hole.

Durante e explosion e dama cu a sende e fornu a haya kima na su pia y un señora a haya golpi na cabes ora cu algo a bula dal e.

E cas a sufri hopi daño dor di e explosion. Bomberonan a keda algun rato mas n’e cas pa mira si no tin mas peliger di gas.

Ambos dama a wordo transporta pa Hospital unda nan lo mester haya mas tratamento. Slachtofferhulp a wordo poni na altura pa nan bay Hospital. 

Algun aña atras un cas na entrada di Calbas Residence tabatin un explosion di gas den madruga.

Un cabayero a resulta seriamente herida y a fayece algun dia despues dor di e heridanan serio ricibi.