Polis a bay sera Blue Moon pa no a mantene su mes na ora di cierre

Diahuebs den careda di 9’or di anochi, Crisisteam a pidi asistencia di Polis pa haci un control na Blue Moon Lounge na Tanki Leendert. Esaki pa motibo cu 9’or tur establecimento mester ta sera, pero cu Blue Moon Lounge ainda tabata habri. 

Probablemente ta for di oranan di atardi caba lo tabatin un fiesta andando y cu nan lo a surpasa e cantidad di persona  cu ta wordo permiti den un establecimento.

Dos patruya di Polis a bay n’e sitio, na yegada enberdad nan a mira  un cantidad di auto staciona pafo y cant’i caminda grandi. Den e establecimento nan a  bin topa tambe cu un cantidad grandi di persona. Polis mesora a bay atende cu esnan responsabel, pasobra e establecimento mester tabata sera caba. Polis mesora a para e fiesta y a exigi tur hende pa bandona e sitio nocturno aki.

E dos patruyanan di Polis a keda warda n’e sitio te ora te tur hende a bay for di e sitio y e lugar a sera.