Feca ta organisa tercer tayer: Disciplina y Responsabilidad

Diaranson venidero dia 28 di april, Fundacion Educador Consciente Aruba (FECA) ta organisa su tercer tayer pa mayornan cu e tema: Disciplina y Responsabilidad.

FECA a organisa dos tayernan anteriormente cu e temanan: Keep Your Cool, unda a siňa mayor con pa keda trankil durante momentonan di pleito, y Siňa bo Yui Respet y Wordo Respeta unda a siňa mayornan con pa papia cu nan yiu pa nan sigui instruccionnan sin uza miedo of negociacion.

E tayer di 28 april na Centro Bario Tanki Leendert ta siňa mayornan con por pone e base pa disciplina propio y responsabilidad uzando componentenan basico.

Carla Briezen, Presidente di FECA ta splica: “Den e tayer otro siman nos lo trata con structura y rutinanan ta yuda e celebro di un mucha funciona optimalmente p’asina e yiu por desaroya disciplina propio desde un edad hopi jong caba.

Alabes nos ta refleha kico mayornan mes ta compronde bou di disciplina, p’asina nan por ta un bon ehempel pa nan yiunan” asina Carla Briezen a comenta.  

Teiry Croes, mama di dos yiu (6 aňa y 1.5 aňa) ta recomenda: “FECA su workshops ta sumamente interesante pa tur mayor y persona cu ta traha cu mucha cu ta busca e tools pa por disciplina y educa muchanan di un manera mas consciente”.

Melissa Arends, mama di dos yiu ( 5 aňa y 3 aňa) ta aňadi: Cu Disciplina Consciente nos como mayor por mihor compronde e impacto di nos accion y palabranan riba nos yiunan y ta mas consciente di esaki. Sigur un recomendacion pa tur mayor y educador”.

Fundacion Educador Consciente Aruba a wordo lansa na november 2019 y tin como meta pa contribui na un desaroyo social emocional saludabel di nos muchanan ofreciendo conocemento y practica di Disciplina Consciente na tur mayor, educador,y comunidad en general.

E tayer di Disciplina y Responsabilidad  ta tuma lugar na Centro Bario Tanki Leendert, diaranson 28 april di 7pm -8.30pm.  Pa registra por whatsapp 560-0679 of mail fecaruba@gmail.com Pa mas informacion por bishita e Facebook page: www.fb.com/educadorconscientearuba