Acusadonan di negoshi di droga den Madiki den Corte

Informacion ricibi riba bendemento di droga na un adres specifico na Madiki, a pone cu departamento a bay vigila e adres en cuestion.

Despues di a haya suficiente informacion a pasa pa detene: Johan Jahin M.G.; Challier Alvaro B.; lana Geerdina V.d.P.; Osmar Oscar T. y Bernard Bryon F. Nan caso a bini den Corte, cu excepcion di esun di e acusado femenino pa motibo cu su abogado no por tabata presente.

Hues a repasa e procesverbal unda a informa e acusadonan di tur loke Polisnan a constata durante e vigilancia cu a tuma lugar den luna di september, 2020. E modus operando di auto y hendenan yegando entregando algo y ta haya algo den nan man.

E siguiente paso despues di e vigilancia y cu a haya informacion di sospecho di cosnan ilegal tumando lugar n’e adres en cuestion, a haya permiso di Hues Comisario pa tira un razia y aki a canta bingo.

A detene no solamente comprador, pero tambe algun persona den e cas.

E tabata un bon razzia, pasobra hasta a haya administracion cu nomber di e clientenan, nan dealernan pero tambe proveedornan.

A confisca tambe diferente tipo di droga manera marihuana, cocaina, zeta di cannabis, mata di marihuana y diferente tipo di pilder. Un negoshi completo.

Tambe a confisca placa, tanto dolar como florin. A bay cu un suma basta grandi di casi 10 mil florin. 

Den e mesun caso aki a confisca for di un auto cu a busca mercancia n’e cas mas cu 30 sakito cu diferente tipo di droga den nan. Tabata trata di e acusado Johan Jahin M. y a hay’e tambe cu placa efectivo.

Ta sospecha cu e lo por tabata bay entrega droga pa motibo cu a hay’e cu un buki cu nomber tambe.

E caso aki tin un rabo largo, pasobra basa riba e administracion di e negoshi aki a haya mas nomber cu ta wordo investiga den un caso apart.

Fiscal ta considera e acusado Challier Alvaro B., como e persona cu tabata encabesa e negoshi aki y el a bin ta haci esaki pa algo tempo caba. Tur cos confisca tabata na su cas, inclusivo e armanan di candela y e placanan cash.

P’esey el a pidi Corte pa impone un castigo di seis aña. Pa Bernard B. a pidi un castigo di 18 luna; pa Osmar tambe 18 luna, pero un parti di esaki ta condicional y pa Johan, kende no ta prome biaha ta haya su mes envolvi cu husticia, el a pidi un castido di 18 luna.

Aki tres siman tin sentencia.