Awor si ta ora pa Minister Bikker sigui conseho di Parlamentario Bikker y retira

Como Minister di Hustica na poder, Andin Bikker no tabatin vision y no tabatin maneho y awor cu e ta demisionario, tampoco e tin capacidad  pa atende cu e ola di criminalidad cu ta pasando den comunidad.

Arthur Dowers di AVP a mustra cu ta increibel cuanto actonan di violencia, uso di arma di candela y arma blanco, atraconan den cas di hende y riba comerciantenan, ta tumando lugar, mientras cu Aruba tin un Minister demisionario cu parce ta demisionario for di 2017 ora cu el a huramenta.

“For di prome dia di aña 2021 tin cantidad di caso di uso di arma di candela tumando lugar, cu a costa bida di varios hoben, agresion cu arma blanco den varios bario rond Aruba sin c’un dia Andin Bikker por a bin dilanti y mustra pueblo kico e lo bay haci pa contra aresta e situacion aki.

Ta mesun Minister di Husticia inhusto aki, t’esun cu a priminti pueblo cu e lo reduci criminalidad asina cu e bira Minister di Husticia, cu e lo laga instala camaranan na casi tur cas rond Aruba, cu e lo percura pa Cuerpo di Polis ta bon ekipa y awor ta bin resulta cu ni computer e por a regla pa Polisnan haci nan trabou mihor.

Unico cos cu e Gobierno di Bikker a haci, ta kita salario for di Polisnan, reduci nan entrada a base di un plan cu su Prome Minister a presenta na Hulanda, pero algo riba su maneho pa realmente reduci criminalidad, niks en nog eens niks.”

E unico logra di Minister demisionario Bikker, ta su propio deseo di un dia a fungi como Minister di Husticia, pues su soño a bira realidad, mientras cu pueblo mes no por drumi drechi y  ta sufri di ‘nachtmerrie’ p’e maneho cu e Minister aki a bin ta hibando.

Normalmente un Minister demisionario ta keda haci cosnan rutinario te ora cu eleccion tuma lugar, pero lo ta bon pa Andin Bikker scirbi historia, bay den bukinan di historia politico di Reino Hulandes, como e prome y unico Minister demisionario, cu ta tuma retiro ya cu hasta como demisionario,  e no tin maneho pa proteha su pueblo, segun Arthur Dowers.