Boeing 777 nobo di KLM a dal den tùnel di pasahero

Aktividat i operashonnan riba rampa di aeropuertonan mundialmente ta asuntunan altamente orkestrá ku masha delikadesa i ora un avion dal den un tùnel di pasahero of un vehikulo riba rampa, ta investigashon profundo tin ku hasi.

Esei tabata e kaso siman pasa na Schiphol ora ku personal di rampa tabata tou un avion Boeing 777 nobo-nobo preparando pa subi pista, el a dal den e brùg di pasahero ku ta kondusi pa kabina dje avion.

E aksidente ta no solamente kostoso, pero bergonsoso pasobra no ta kos ku mag pasa. El a pasa ku un Boeing 777-300 ku tabata den push-back na Schiphol kla pa subi pista i lanta buelo, pero e brùg no tabata bon stashoná ni ankrá.

Komo konsekuensia dje impakto punta dje ala a sufri daño i nan a kuminsa traha riba su reparashon mesora.

Punto di salida dje tùnel ku nan ta yama jetbridge a pega riba punta dje ala.               

KLM tin dje avionnan  31 Boeing 777 den servisio i mitar di nan te vershon mas kòrtiku seri -200, mientras ku e otronan ta dje model -300ER ku por bula mas leu i por transportá mas pasahero.

Kuater luna pasá el a sali for di fabrika. Te ku siman pasa e avion a hasi 14 buelo pa un total di 80 ora.

Normalmente no sa tin masha dje insidentenan aki, pero nan sa sosodé pa motibu di eror humano of ora tin tormenta di bientu.

Ultimo biaha ku tabatin dalmentu di avion kontra un opheto tabata na Schiphol dia 20 di yuli aña pasá ora un dje brùgnan a dal den un avion di TUI.