Delegacion di AVP a reuni cu AHATA y ATIA

Den cuadro di preparacion pa traha riba un plan di gobernacion, Parlamentario sra. Jennifer Arends Reyes hunto cu lider di partido, mr. Mike Eman a sinta cu AHATA y ATIA riba e ‘state of the industry’ pa mira con lo sigui dilanti despues di e pandemia cu e pais a pasa aden.

Den e reunion aki sra. Jennifer Arends Reyes a mustra cu ta di vital importancia pa tin dialogo cu gremionan cu mester traha hunto cu Gobierno pa wak con lo saca e pais dilanti, atende cu tur e situacionnan cu a surgi despues di e pandemia y discuti riba e forma con lo sigui dilanti p’asina percura p’e desaroyo fructifero no solamente p’e desaroyo economico y financiero, pero tambe pa bienestar di tur ciudadano riba e isla.

“Nos a hiba un reunion sumamente fructifero y informativo pa loke t’e situacion actual, con nos ta para den e pandemia actual, kico e ta nifica pa nan den e industria hotelero, pero tambe kico esaki ta nifica p’e trahadornan.

Nos a papia con e pais lo sigui dilanti y kico Aruba lo por spera y kico nos futuro lo bira trahando hunto cu otro den un esfuerso conhunto pa di e forma aki por yega na un desaroyo sostenibel pa nos turismo, pero tambe pa pueblo di Aruba.

Un reunion sumamente importante caminda e base di exito pa move  y saca e pais dilanti, sin duda e aspecto di dialogo ta bira algo sumamente necesario y importante,” Parlamentario Jennifer Arends Reyes a declara.

Mescos lider di AVP, mr. Mike Eman a mustra den e reunion aki cu e pais ta pasando den un situacion cu ta afecta henter comunidad caminda hotel y comercio tambe ta sinti efectonan di crisis aki. El a mustra cu den concepto di AVP, Aruba mester di un plan proactivo pa recupera y rescata economia di e isla y ta necesario pa tur hende coopera cu e plan di vacunacion p’asina por cuminsa na atende tur aspecto di e crisis, caminda mester yega n’e meta di tin un gran cantidad di e pueblo vacuna, mester tin un plan proactivo.

Logrando esaki por habri economia, turismo mester bolbe florece y empleadonan yega na 100% di nan salario, ya cu trahadornan a sufri hopi unda ta ricibi practicamente entre 60 y 80% di nan salario cu nan tabata ricibi prome cu e crisis aki.

AVP a ricibi hopi keho di circunstancianan dificil cu hopi den pueblo bibando. Pero tambe ta mira cu turistanan ta yegando, algun ta haciendo inversion, mientras ainda por mira cu salario di mayoria di trahadornan ta para ainda na 60%.

Mester tin un maneho macro, no solamente p’e isla, pero tambe pa su ciudadanonan y tur e aspectonan aki nos a treci dilanti den e combersacion cu e instancianan aki.