No por legalisá yiu ilegitimo despues ku e tata muri

WILLEMSTAD – Un kaso legal di karakter familiar ku ta toka leinan di rekonosementu di un yiu ilegitimo i eventual heredero di un difuntu a keda rechasá pa Hues di Corte den Promé Instancia na Kòrsou prinsipalmente, pasobra e lei al respekto ta diferente riba tur e paisnan i islanan di munisipio Hulandes den Karibe.

Na Kòrsou e lei ta un manera, na Aruba no tin e lei mes i na Boneiru tampoko Hulandesnan no a regla e asuntu aki.

E petishon a bin di parti di un persona ku a nase na Bonaire i den pasado tempu e tata tabata na bida i a ofresé pa rekonosé e yiu, e yiu a ninga.

Despues di morto dje tata, a sufri asuntu di herensia i e yiu ilegitimo su mama a reklamá e parti ku lo ta koresponde na su yiu, pero lei no tin provishon p’esaki.

Dia 8 desèmber e yiu a entregá un petishon den Corte i luna pasá Corte a tene tur hende envolvi i a tende e mama via video.

Mama dje mucha homber tabatin un relashon ku e homber na Bonaire, pero el a bin fayesé.

E yiu a akudi na Corte pa Hues konfirmá ku e homber ta legalmente su tata, pero e ke keda ku fam di su mama.

Na 1998 a hasi prueba genetiko di DNA dje homber i e yiu i a konstatá ku e homber ta tata dje yiu.

Ku e resultado ei den man, Korte a ordená e homber pa paga alimentashon dje yiu.

E yiu a keda biba serka su mama na Kòrsou te dia e tabatin 17 aña i despues a bai Bonaire bai biba serka su tata.

Ni asina no a rekonosé e yiu, pasobra e yiu no tabata mira balor di esei: e kier a keda ku fam di su mama.

E decishon aki awor a haña un rabu largu pasobra dia su tata a muri e no por a partisipa den su herensia, pasobra lei na Bonaire no tin hurisprudensia di un situashon asina.

Tin kantidat di ehempel huridiko internashonal ku ta indiká dikon e no por ta heredero maske ku e kos aki ta diskriminatorio.

Reino Hulandes ta rekonosé yiu ilegitimo komo  igual na e famia legal, pero den Karibe lei ta limitá e posibilidat pe haña herensia.

E mester pidi i haña parti dje herensia denter di sinku aña di morto di su tata.

Asina mes Hues por limitá e parti di herensia dje yiu ilegitimo si esaki ta afektá e parti ku e viuda legal i su yiunan mester haña.

Ku otro palabra: E no por haña meskos.     

Pa inhustu ku e Hues ta haña e situashon aki, e no por traha lei riba su mes, pasobra esei ta toka na Parlamento dje islanan.

Por lo tantu el a nenga petishon dje yiu pa bira heredero dje tata.