UN BON INVERSION

Pa: Armand Hessels

Poco despues di eleccion na 2013, un conocir a conta’mi di un recien bon inversion cu el a haci. Contra di su custumber pa financia un partido politico, e biaha aki sí el a haci’e. Pasobra e partido na mando simplemente no por a perde victoria. Consecuentemente e tabata sigur cu e lo gana su aporte substancial n’e caha di campaña di e Ministro di Infrastructura bek cu bon interes. Esey a resulta di ta corecto: Poco despues di eleccion el a obtene un tereno dilanti e hotelnan grandi riba su nomber.

SIN BERGUENSA

E kier a uza e tereno pa construccion di un compleho di apartamento. Al fin y al cabo e no tabatin suficiente placa. Pues el a bende e tereno y a pidi -cu exito- un otro tereno. P’e no tabata existi un lista di espera. Pa mi esey no tabata ningun sorpresa. Ya pa decada esaki t’e modus operandi di ‘politica’: “Yuda’mi yega na poder y mi ta percura pa bo haya bo recompensa”.

Pero e recompensa ey no ta sali for di e saco di e politico concerni of di e partido. No, sin ningun tipo di berguensa nan ta haci uzo di e propiedadnan di Pais Aruba di cual nan ta pretende di por dispone di nan libremente.

NEGOSHI DI CAMBIO

Como consecuencia, hende cu sí ta/mester tene nan mes n’e regla- y proceduranan prescribi, por keda warda pa añanan largo riba nan tereno. Esnan cu no tin un relacion personal cu e ‘tumador di decision’ y tampoco tin suficiente placa pa ‘influencia’ decision, mester para patras den rij y spera cu e politico lo mira nan peticion poco prome cu e siguiente eleccion. Pasobra e ora ey net lo contrario por tuma lugar: Otorgamento di tereno a cambio di voto: “Rasga mi lomba pa mi rasga esun di bo”.

MERCADO

E negoshi aki a tuma lugar riba varios tereno, specialmente na unda sa otorga permiso. Permiso pa (fuera di e proceduranan normal) logra tereno (grandi); pa logra (liher!) permiso pa construccion; pa por importa (riba termino corto!) personal pa construccion di specialmente hotel (grandi!); pa personal cu tabata necesario pa traha den hotel, etc.

Y regularmente sa pasa cu empresa no sa haya un permiso definitivo, sino uno temporal. Sa renob’e den tempo di eleccion, despues cu e empresa a duna un aporte (substancial) n’e caha di campaña di e partido na mando.

NEGOSHI

Pa hopi hende esaki aparentemente tabata normal. No ta por nada cu un Ministro a declara algun aña pasa: “Mi a bira Ministro pa mi haci negoshi”. Pa hopi aña esey tabata posibel, tanten cu economia a produci suficiente pa tuma hende sin limitacion den servicio; tanten tambe cu tabatin suficiente tereno disponibel; tanten cu practicamente no tabatin control riba funcionamento di funcionario di Gobierno y tanten cu ciudadano no tabata tribi mucho pa ta abiertamente critico.

Awor cu entrada di impuesto por lo pronto ta limita y cu no por sigui cubri gasto excesivo mas, cu tin un maneho di tereno mas estricto, cu ta vigila funcionamento di Gobierno mas frecuente cu un lupa y cu hende ta bira mas asertivo, ‘negoshi-manera-semper’ ta bira cada bes mas dificil.

PREGUNTA

E patronahe politico y e ‘negoshi cu propiedad/servicio di Gobierno’ cu pa hopi tempo a hunga un papel predominante, ya no ta sostenible mas. E pregunta ta si e partidonan politico cu a hunga un rol asina determinante den esaki, por sigui hunga un papel politico di importancia. Pasobra, dor di nan ‘maneho’, un pio cu otro, Aruba ya caba prome cu e pandemia di Covid, tabata den un sitiuacion hopi penoso. Riba dje, hopi biaha gobernante a hiba mal gobernacion bou di ‘supervision’ di Parlamento.

Pesey nos mester puntra nos mes si e sistema politico actual ta ofrece suficiente garantia pa para e ‘gobernacion tradicional’. Finalmente e pregunta ta si (organisacion di) ciudadano y e gremionan comercial y sindical por/kier demostra e curashi necesario pa hunga un papel significativo pa cu mehoracion di gobernacion. Al fin y al cabo esey tambe ta den nan propio interes. E contesta riba e preguntanan aki ta determina e futuro di ‘politica’ y di comunidad di Aruba.