Corte sa tin sentimento humano y esaki a keda demostra siman pasa

WILLEMSTAD – Ounke por lo general verediktonan di kaso penal no sa okupá e puesto titular di korant, esei lo te kaso siman pasa konsiderando ku un veredikto ku Korte di Hustisia a tuma no awor, pero awor numa nan a revelá, ta demostrá grado di sintimentu super humanitario den kaso di un hoben di apenas 22 aña, kende a kometé un fayo garafal ku e maldito droga atrobe, pero konsiderando su sirkunstansianan personal i ta promé biaha ku e ta hañ’é den un kaso asina, e kastigu di prizon ku pa regla e mester a haña, a bira un kastigu di trabou fòrsá.

E kaso a bai dilanti Corte dos biaha, promé biaha den Promé Instansia i tabatin Apelashon dje kastigu el a bai resultá den Korte di Hustisia Komun pa tres Hues tuma un desishon.

E hoben aktualmente tin 24 aña pero dia el a kometé e eror di su bida pa bai eksporta kokaina, e no tabatin ni 22 aña.

Den Promé Instansia Hues a kondené segun regla di kondena pa droga, na un kastigu di di 18 luna di kual 9 luna kondishonal i un periodo di prueba di 3 aña.

E hoben a apelá e sentensia i a tende e rekisitorio di Prokurador General den e kaso aki. Abogado dje hoben tabata mr. M.C. Vaders.

Prokurador General a pidi pa konfirmá e kondena original di 18 luna i Korte di Hustisia a bai di akuerdo ku e proseso menos e parti di kastigu.

Korte di Hustisia a tene kuenta ku seriedat dje delito i ku e reglanan di kastigu maksimo pe tipo di delito di eksportashon di 1.185 gram di kokaina, pasobra kokaina ta masha dañino pa hende i tin konsekuensia fuerte pa adiktonan.

Na fabor dje akusado Korte di Hustisia a husga su sirkunstansianan personal manera a bin dilanti.

Nan a tene kuenta ku e akusado ta un homber relativamente hoben ku nèt dia el a hasi 22 aña a kometé e hecho. Nunka antes ela komete un delito.

E ta studiando pa Tekniko Sterkstroom Installaties na Openbaar Secundair Beroeps Onderwijs.

Banda di esei e ta traha komo agente di alkiler di outo i ta boluntario di organisashonnan sosial pa un fundashon  ku ta yuda mucha i hende grandi ku ta biba den pobresa.

E ta boluntario pa un otro fundashon ku ta atendé ku muchanan despues di skol i ta yuda nan traha huiswerk.

‘On top’ di esei e ta kasi tata, pasobra su kompañera di bida ta na estado kompliká i e ta kria e yu di seis aña dje amiga.

Ademas ta kasi dos aña ku el a kometé e hecho i nunka mas el a hañ’é den problema ku hustisia.

Konsiderando tur esaki e tres Huesnan a haña ku nan mester tene kuenta ku e aspektonan positivo aki i kambia e kastigu di prizon pa un kastigu di trabou fòrsá i alabes duné un señal fuerte ku el a kometé un delito grave.

Por lo tantu e no a haña kastigu di prizon, pero lo haña e kastigu di trabou máksimo ku por duna ku ta 240 ora di trabou. Si e faya, e tin ku bai será pa 4 luna.

E Huesnan ku a dikta e veredikto hopi klemente i humanitario aki tabata mr. S.A. Carmelia, M.C.B Hubben i W.J. Geurts-de Veld.