Gobernador a atende ceremonia protocolario

Gobernador di Aruba, Alfonso Boekhoudt, diamars 27 di april 2021 a asisti n’e ceremonia protocolar en conexion cu Dia di Rey. P’e ocasion aki, Minister di Finansa, Asunto Economico y Cultura, Xiomara Maduro, Luitenant Kolonel Art van Beekhuizen y Presidente di e Comision Celebracion Dianan Nacional (CCDN) John Flemming a ricibi Gobernador Boekhoudt na Wilhelmina Park.

Despues di un inspeccion di Forsa Arma di un unidad di Cuerpo di Marina Real, durante un ceremonia cortico a hisa e banderanan di Reino y di Aruba, sigui pa tocamento di e respectivo himnonan cu tambor y gaitero di Cuerpo di Marina Real.

Presidente di Parlamento, señor Juan E. Thijsen, a hiba palabra, sigui p’e presentacionnan di baile di e gruponan Guccci Dancers y Pierewietje.

Na final di e ceremonia e Comandante di Forsa Arma a meld af su unidad y a saluda Gobernador di Aruba cu honor. Seguidamente a acompaña Gobernador Boekhoudt pa A-1 den cua, bou di compaño motorisa, a bandona Wilhelmina Park.

(potret: © Kabinet Gouverneur)