Hoben (16) rabia mey-mey caminda cu baranca den man

Dialuna anochi algo pasa di 8:30, informacion a drenta cu lo tin un hoben mey-mey caminda na Wayaca, y den su man e tabatin un baranca.

Na nos yegada por a mira cu berdad tin un mucha homber (16) canando den cirkel net mey-mey di caminda. E tabata haci un zonido manera di ta hopi rabia, un tono constantemente. 

Den algun minuut a presenta dos patruya, un banda panort y e otro banda pazuid. Agentenan a baha y a bay direccion di hoben, bisando e pa benta e baranca abou.

Dado momento e hoben a core bay direccion di un cura di cas y a bula esaki bay patras. E baranca el a lage cay.

Agentenan a bay patras, pero a ripara cu e mucha homber posiblemente lo a bula otro cura bay.

N’e sitio tabatin algun famia, cu claramente tabata mustra preocupa. Algun rato mas despues Polis lo a localisa e hoben y a papia cu ne.

Na prome instante esnan cu a mire a pensa cu e lo por tabata bou influencia di algo, pero a resulta cu esey no tabata e caso.

Segun famia algo lo pasa algun rato prome cu a pone rabia y bira asina, pues e no tabata bou influencia di nada.