Minister Xiomara Maduro ta confirma cu BTW di 12.5% lo bira un “feit”

Un Gobierno cu no a cumpli cu pueblo den mas di tres aña na poder, ta sigui  ‘basila’e mesun pueblo aki, cu cierto noticia cu nan ta kere ta sumamente importante y cu lo duna e Gobierno beneficio di duda cerca pueblo.

Siman pasa Minister demisionario di Finansa, Xiomara Maduro, a declara cu otro medida cu stempel di Gobierno di MEP ariba, esta e BTW di 12.5% cu segun tanto CFT como Gobierno Hulandes, ya mester a drenta na vigor, lo no bin por lo pronto.

E mandatario demisionario a trata di duna e impersion cu loke el a participa, mester ta un alivio pa pueblo di Aruba, esta cu otro medida cu su Gobierno di MEP a impone riba pueblo, lo no por mishi cu cartera di pueblo te cu 2023.

E medida di 12.5% aki cu a ta conoci como “value added tax”, na Hulandes conoci como BTW,  tur hende tin cu paga na caha di cualkier negoshi ora cu nan haci un compra y mester a drenta na vigor for di dia prome di maart ultimo caba, pero un biaha mas e Gobierno di Xiomara y Evelyn, no por a cumpli cu loke nan mes a priminti Hulanda cu nan lo haci.

E medida aki mester a drenta for di prome di januari caba di e aña aki, mientras cu despues a schuif e fecha pa prome di maart, pero ni presupuesto 2021 ainda a wordo trata den Parlamento, no cu esaki ta necesario, pero pa pretende awor cu esaki ta un alivio pa pueblo, ta algo ridiculo pa haci.

Hecho ta y esey Minister Xiomara Maduro a sigura pueblo bon cla, esta cu BTW lo drenta na vigor, c’un tiki tardansa, c’un tiki triki cu e Gobierno aki semper a usa den su tres aña na poder y awor parce cu Minister di Finansa tambe ta kere cu nan ta “Nederland te slim af.’

Sinembargo e propio mandatario ta mustra cu segun e Landspakket cu a wordo acorda pa Prome Minister Evelyn Wever Croes for di aña pasa caba, Gobierno di Aruba mester a ehecuta e ‘plan van aanpak’  aki masha tempo, esta cu e mester a bira oficial.

Awor e mandatario pa papia di un ‘resultado’ sin splica di kico, lo bin cambio den introduccion di e medida aki, contra un pueblo cu ya ta sufriendo financieramente, socialmente, economicamente y cu por lo pronto no lo por introduci e BTW aki.

Segun Minister Maduro, lo tuma un periodo di 18 luna pa introduci e BTW, cu otro palabra  pueblo tin cu spera yegada di otro medida mas di Gobierno di MEP, sigur sin Gobierno di MEP mes na mando, pero ya caba e Minister y su Gobierno a descubri un formula pa alarga introduccion y asina MEP  haya menos presion den campaña electoral.

E mandatario a mustra cu prome cu impone e medida di BTW mester di un periodo di un aña den cual periodo lo conscientisa pueblo di e medida aki loke ta pone cu segun Xiomara Maduro, e BTW lo no por drenta mas na vigor pa 2021 ya cu falta 8 luna pa aña caba y despues den 2022 tampoco e ta kere cu esaki lo drenta na vigor, apesar cu di e un aña cu el a menciona, lo a resta solamente cuater luna, pues mas tarda esaki lo drenta na vigor net aki un aña.

Sinembargo esey ta si Gobierno di Reino y CFT lo ta di mesun pensamento ya cu no ta prome bes cu Gabinete Wever Croes ta interpreta un medida diferente cu CFT y Gobierno di Reino ta interpreta esaki.