No mas promesa falso pero 100% transparencia den posibel reapertura di refineria

Diabierna 23 di april 2021 UPP a tuma nota cu Prome Minister Wever-Croes a haci entrega na Parlamento e raport forensico riba e maneho en general na RDA. Ta di spera cu nos Parlamento lo sa di trata esaki cu tur seriedad den un reunion publico y no den un “Buitengewone Bijeenkomst”!

Loke ta hala nos atencion t’e timing cu e Gobierno demisionario a usa pa na prome lugar presenta e raport forensico y na di dos lugar informa riba e posibel reapertura.

Eleccion ta na porta y e Gobierno sa cu e pueblo lo husga e falta di cumplimento di promesanan haci prome cu e eleccion anterior. E unico “logro” ta entrega di nos autonomia. Awor ta usa e mesun tactica cu tanto a critica e Gobierno anterior, esta un secrecia encuanto e negociacion cu esnan interesa den e operacion di e refineria. UPP kier ta hopi cla. Nos por a ripara cu e unico momento cu San Nicolas ta haya atencion di Gobierno ta tempo di eleccion y e biaha aki no ta diferente.

E tempo cu ta bin cu promesanan falso den campaña a pasa pa pasado. E pueblo di Aruba en general y e pueblo di San Nicolas en particular no kier esaki mas. Ta p’esey UPP ta exigi 100% transparencia den e asunto di e posibel reapertura di e refineria. Aruba y sigur San Nicolas ta pasa atrobe den su pio momentonan.

E necesidad pa diversifica nos economia mester ta halto den e lista di prioridad y den cuadro aki, un “State of the Art Refinery” ta un posibilidad magnifico pa promove economia. Un condicion importante sinembargo ta cu e refineria mester cumpli cu tur e exigencianan ambiental y cu lo percura pa cuponan di trabou di calidad pa nos profesionalnan.

UPP den su programa ta papia cu cualkier inversion mester cumpli cu e principio- PPP! Pues mester ta beneficioso p’e People(P), e Planet (P) y e Profit(P).

Bou ningun circumstancia por permiti cu den campaña ta bay firma un contracto den tur secrecia. Un contracto cu lo bay mara e Gobierno nobo manera cu e drenta y ta mara Aruba pa por lo menos 20 aña y cu sigur lo bay encera cu Patrimonio di nos Pueblo lo ta parti di dje. Y nos MP no por bay sconde cu e no sa di nada pasó RDA ta un entidad autonomo.

Berdad RdA ta autonomo, pero e unico ACCIONISTA t’e Pueblo Arubano. P’esey un suplica ta bay n’e gerencia di RDA pa no participa n’e weganan politico partidista y populista.

Aruba no por permiti un otro “Citgo-Gate” na unda a “scarmay” miyones di florin y ta parce cu algun hende a hinca miyones den nan saco.

Gerencia di RDA y tur esnan cu ta hibando e negociacionnan lo sirbi nos pais y nos pueblo pa no cay p’e presion di e MP cu ta parce cu kier hunga un biaha mas e rol di “mi no sa”, pa si cos bay robez e por bisa cu ta responsabilidad di RDA, pero lo ta para prome den rij pa corta sinta of ta fiesta si cos bay bon.

RDA por pensa cu e ta compania priva, pero e ta un compania cu ta propiedad di e nos pueblo, y p’esey nos pueblo tin derecho pa sa tur kico ta pasando cu su propiedad. Transparencia ta nifica cu mester habri cu pueblo y no core bolbe bay sera contratonan den secrecia y pa despues nos bin haya nos cu hechonan realisa.

UPP banda di ta exigi 100% transparencia ta exigi tambe cu atrobe San Nicolas no wordo “lubida” ora yega e momento cu por haci uso di e entrada di RdA, pa inverti den nos economia y proyectonan social, deportivo of di infrastructura.

UPP ta urgi pa prioridad den inversionan wordo haci directamente p’e desaroyo di San Nicolas cu pa aña largo mester a keda contento cu “kruimels” y tin biaha te hasta ta wordo completamente lubida.

Ehempelnan clasico ta cu placa a caba net na momento cu mester a cuminsa construccion di e MFA p’e pueblo di San Nicolas, mientras nunca a finalisa e proyecto di Carnaval Village. E lider di UPP como Minister a duna muestra di ta convivi cu San Nicolas y tur e barionan Pariba di Brug ora a trece un departamento, un edificio y servicio di SVB y un facilidad medico super moderno pa San Nicolas.

UPP ta cla pa pone su schouder bou un desaroyo real pa San Nicolas pasó nos curazon ta bati p’e causa aki. San Nicolas florece, Aruba ta florece!