No tabatin violashon di integridat na Sekretariado di CFT, pero a hasi kambio

Willemstad – Despues ku Kolegio di supervishon finansiero a risibí notifikashonnan anónimo, riba enkargo di Presidente Raymond Gradus a entamá un investigashon independiente.

A base di e investigashon aki a konkluí ku no tabatin violashon di integridat ni komportamentu eksesivo; sí a konstatá ku tabatin kaso di deskuido.

Ta nesesario pa introdusí mehorashon den e organisashon atministrativo i hasi e proseduranan interno mas skèrpí na Sekretariado di Cft.

E notifikashonnan anónimo, kual a keda entregá na komienso di aña, tabata kontené akusashon kontra Sekretariado di e tres Kolegionan. E agensia independiente EBBEN PARTNERS a hasi e investigashon.

Presidente di CFT, Raymond Gradus a splika ku ounke e notifikashonnan a keda hasí anónimamente, el a konsiderá komo su responsabilidat pa tuma e alegashonnan ei na serio i laga un agensia independiente investigá nan mas pronto posibel. Miéntrastantu esei a tuma lugá i el a risibí e relato di e investigashon.

El a sigi splika ku apesar ku a base di e investigashon no a konstatá violashon di integridat ni kondukta eksesivo, ta resultá ku tin nesesidat sí pa den sentido general hasi e proseduranan interno mas skèrpí.

Komo resultado di e konklushonnan di e investigashon a tuma vários desishon.

P.e. ta formulá e proseduranan relashoná ku dunamentu di trabou na personal riba un base temporal i esnan relashoná ku biahamentu pa eksterior den un forma mas skèrpi, i den futuro lo no duna gratifikashon den natura mas.

Ademas, lo pone e maneho di gratifikashon riba papel, e presidente lo aprobá esaki i e sekretario lo aplik’é.

Riba un otro tereno tambe lo hasi un korekshon. Asina ta ku te desèmber 2019 tabata paga anualmente un gratifikashon di Pasku di ANG 1.000 neto na tur empleado di e Sekretariado. P’e personal lokal tabata konvertí e gratifikashon aki den un suma bruto.

A keda sin hasi e prosesamentu atministrativo aki p’e personal ku ta bini di eksterior. Lo konsultá awor ku e Ministerio di Asuntunan Interno i Relashonnan den Reino kon ta konvertí e suma neto ainda den un suma bruto p’e empleadonan aki.

A base di un ouditoria lo determiná mas despues si a kumpli korektamente ku e proseduranan di e atministrashon di salario.

Segun Gradus, Cft tin un funshon ehemplar. Ta importante pa tur hende na Cft demostrá un komportashon kompletamente íntegro. A inisiá un trayekto pa sigui hisa e nivel di konsientisashon riba tereno di integridat ku asistensia di un persona di konfiansa.

Droga kos’é den Boxer…..

Mula a pasa kontròl na Hato bai kai ku 1.251,6 gram na Schiphol

WILLEMSTAD – Siman pasá djaweps tabata dia di dikta veredikto di entre otro mulanan ku a kai ku droga na Schiphol aña pasá.

Entre nan tabatin un yu’i Kòrsou di 37 aña kende parse nunka a tende di e dicho ku niun buriku no ta dal su pata dos biaha ne mesun piedra, pasobra  den pasado el a yega di kai será kaba komo mula na Fransia.

Na final dje kaso Hues a kondená e mula mas bobo ku buriku na 12 luna di prizon.

Komo ku el a kai será for di 11 oktober aña pasá a deskontá e lunanan ku el a pasa den detenshon preventivo ya el sinta mitar di kastigu kaba.

E aventura malográ a kuminsa dia 23 di september aña pasá i a kulmina ku su kaptura dia 11 di oktober dje mesun aña.

E homber ta biba na Tilburg kaminda poko bandido ku tabata sa ku el a yega di transportá droga i ta den nesesidat, a ofresé 3500 Euro pa bin Kòrsou bin buska kokaina i hiba Ulanda. Nan a paga su pasashi i estadia pe na Kòrsou.

Su kompinchinan mes a hibé Schiphol dia el a bin Kòrsou i a bai busk’é dia el a retorná Hulanda, solamente ku ya ela kai den brasa di Marechaussee.

El a kai fasil na Schiphol, pasobra e kokaina tabata kosé den Boxer i kachó a bira loko ora el a sali for di avion.

Unabes ku a gara e mula, el a basha’bou riba e dos kómplisenan, kendenan a basha’bou ku sonido i koló di Panasonic.

Pa kolmo un dje kómplisenan tabatin un papel ku 4 number di telefon i nan a lesa 8 mensahe di App ku e mula a manda for di Kòrsou pa Tilburg.

Entre otro unu ku ela manda den avion baiendo Ulanda pa informá nan k ela pasa kontrol na Hato i ta den avion kaba.

Tambe Marechausse a konstatá ku trafikantenan a usa e kódigo di Telegram pa komuniká ku otro kompleto ku un kódigo pa eliminá e mensahe despues di 5 sekònde!