Ruman di Secretaria di Conseho di Minister Raad y di Joe Koolman di MEP ta wordo sacrifica

E desesperacion pa presenta argumentonan politico valido den campaña electoral, siman pasa a un limite desproporcional ora cu partido MEP a dicidi di usa e forensic raport riba RDA, pa trata di ataca tanto lider di AVP, Mike Eman y e otro candidato di AVP, Richard Arends.

Varios publicacion a bin dilanti den medionan di comunicacion, mientras cu varios candidato di e partido geel, a trata di usa e raport aki como arma politico contra hendenan di AVP.

Sinembargo ta mustra cu e falta di haya un argumento adecuado pa trata di gana confiansa bek di votadornan, partido MEP a lubida por completa e laso familiar cu ex Director di RDA, esta Alvin Koolman, tin cu e propio partido geel aki.

Mientras cu ta punta dede riba politiconan di AVP, a lubida por completo e relacion familiar di  Alvin Koolman cu tin cu partido MEP, caminda algun di nan tin puestonan importante hunto cu e partido di lider Evelyn Wever Croes.

Por ehempel, Secretaria di Conseho di Minister, tempo di Gabinete Wever Croes lidera pa Evelyn Wever Croes, ta sra. Grace Koolman, kende ta ruman di Alvin Koolmany sin duda cu e tipo di campaña aki, ta algo incomodo p’e persona aki, pero tambe pa henter e famia Koolman, conoci di ta sostenedornan di partido MEP.

Fuera di e Secretaria di Conseho di Minister cu ta demisionario n’e momentonan aki,  e ex Director di RDA ta ruman di sr. Joe Koolman kende pa varios periodo a fungi como Presidente di partido MEP y  kende ta trahando cu Gabinete Wever Croes.

Den ultimo eleccion di 2017, Joe Koolman tabata riba lista di MEP como candidato number 20 y el a logra un total di 210 voto personal y despues cu Gobierno di coalicion a sinta, el a traha  den edificio di Cocolishi den un posicion cu no ta conoci publicamente, apesar cu Prome Minister semper a papia di ta traha cu transparencia.

Te ainda  faltando 8 siman pa eleccion, ainda e ta trahando den e edificio aki hunto cu e Gobierno demisionario, pero ta hopi remarcabel cu ningun otro candidato di partido MEP of e partido mes, a atende cu e situacion aki, caminda famianan di e ex Director di RDA, t’asina liga y envolvi cu partido MEP.

Sinembargo pa trata di hiba un campaña sin sentido, caminda te ainda ocho siman prome cu eleccion ningun hende sa kico t’e vision di partido MEP, kico t’e solucionnan cu nan lo introduci pa saca e pais for di e situacion cu Gabinete Wever Croes a hinke aden, mescos cu a sosode caba den campaña 2017.

Ta mas cu claro cu ora cu e lider di MEP a bira cabes di Gobierno, su Gobierno no a cumpli cu ningun promesa haci na pueblo, na lugar di soluciona e situacion financiero “sin medida” manera a priminti pueblo, a suta henter pueblo cu cantidad di medida, aumentando costo di bida na nivel nunca antes bisto y lagando pueblo bibando den incertidumbre formal.