Yiu muher bou influencia y agresivo a bringa cu su tata

Diadomingo anochi algo pasa di 10’or varios unidad policial a bay un compleho di apartamento situa den Schotlandstraat.

E motibo tabata cu un yiu muher hoben a yega cas bou influencia y tabata haci bastante problema y segun a compronde e lo a dal su tata.

Polis na su yegada ya a premira problema, manera cu el a cuminsa papia cu e dama. Den e apartamento por a mira hendenan di edad y nan tabata preocupa.

Mientrastanto n’e sitio nos por a scucha e dama ta papia cosnan di pasado, y esaki e tabata keda ripiti. Pues el a haya un maltrip y bin baha su rabia na cas.

Polis a papia cu ne na varios manera, pero a cuminsa lanta contra e agentenan tambe. A pidi transportwagen, pero durante cu ta wardando e dama a keda bira mas y mas altera y agresivo.

E agente su pasenshi a yega un limite y a usa forsa pa hinke den e patrouille wagen, esaki no a bay facil. Pero un colega di prensa a core bay notifica e otro agentenan paden pa yuda y asina a domina e dama.

Algun minuut despues e transportwagen a yega y asina nan pone den dje y despues sali direccion warda unda cu e lo wordo sera den cel pa su haltura baha. No ta nada agradabel pa mayornan di edad mester deal den oranan di anochi laat cu un yiu muher agresivo.