A tuma over proyecto hotel na Sero Colorado manehando fondonan miyonario

E proyecto di construccion di un hotel na Sero Colorado, tabata kisas e unico proyecto cu Gabinete Wever Croes a presenta y cu lo por bira realidad den su periodo di gobernacion.

Mientras cu for di aña pasa a sigura pueblo cu construccion di e hotel aki lo continua cu forsa completo den luna di april, dentro di algun dia e luna aki tambe a vence y ainda no por mira cu e ritmo di trabou a aumenta den e proyecto, conoci como Secrets of Aruba.

Sinembargo pa algun dia caba, mey mey di tur e fanfaria cu partido MEP ta haciendo cu tanto caso Avestruz y e raport forensico di RDA, ta surgi algun informacion sumamente interesante relaciona cu e proyecto turistico aki na San Nicolas ya cu inicialmente ta un proyecto hinca den otro pa ex Minister di Infrastructura Otmar Oduber, pero awor ta parce cu Prome Minister lo a hereda esaki.

E grupo cu lo ta construi e hotel aki, ta registra bou nomber di di ‘Three Rivers Real Estate VBA’ na Camara di Comercio caminda ta mustra cu e compania aki ta conta c’un directiva cu ta entre otro Arulex Trust Services NV  cu a wordo registra oficialmente dia 1 di januari 2021 y a registra Alejandro Murcia di Spaña oficialmente dia 2 di februari di 2021 como su director.

Desde 7 di februari di 2019.

E compania e pone un suma di 7 miyon 106.200  pa ehecucion di e dos hotelnan y a haya un tereno ekivalente na 105.496 m2  na nan disposicion y den documentonan registra na Camara di Comercio, Arulex Trust Services NV ta hunga un rol hopi amplio den e proyecto aki of  cu e desaroyado di e hotel.

Arulex Trust Services NV tin registra como directiva, e conocido abogado Anthony Ruiz, kende tabata colega di Prome Minister demisionario Evelyn Wever Croes, na bufete cu tabata conoci como bufete di Papa Hendrik.

Ruiz segun e documento ta fungi como Director di Arulex Trust Services NV, mientras cu e otro director ta Avilene Croes Thijsen, mientras cu como ‘procuratiehouder,’ ta actua Julisca Zoila Gomez

Ta normal hasta cu den un asunto asina, ta crea un tipo di fundacion, esta un stichting cu lo maneha asuntonan di placa, asuntonan bancario y otro maneho di capital y den e caso aki a crea e asina yama “Stichting Derdengelden Arulex Trust Services NV. cual tambe ta algun normal cu sa sosode den e tipo di desaroyonan aki.

E fundacion aki tambe tin un serie di punto menciona den e documento na Camara di Comercio, kico e ta haci, kico ta su tarea, pues varios asunto legal y financiero, pero caminda e sorpesa grandi a cay den henter e asunto aki, ta ora cu a tuma nota di e directiva nombra p’e stichting aki.

E mesun Anthony Ruiz cu ta Director di Arulex Trust Services NV, ta wordo asigna director di e fundacion y esaki a tuma lugar dia 10 di mei di 2019, mientras cu e sorpresa di mas grandi y hasta controversial, ta aparicion di homber di Hendrik Croes como penningmeester di e fundacion aki y e tin dominio total riba maneho di e fondonan.

Hendrik segun e documento, su nombramento a drenta desde 10 di mei di 2019, pues den e periodo cu ainda Minister di Infrastructura envolvi cu e proyecto hotelero, tabata Otmar Oduber, kende despues di su decision di retira for di politica y como gobernante, a pasa e Ministerio di Infrastructura pa Minister Presidente Evelyn Wever Croes.

Ta un desaroyo cu ta tur hende bek n’e asunto di Irus Crius, caminda tambe Evelyn lo tabata envolvi, pero cu nunca a haya atencion adecuado di instancia y autoridadnan concerni.

Awor un biaha mas tanto un ex colega abogado di Prome Ministe ta envolvi cu e proyecto hotelero y pa colmo nomber di su tata ta registra como accountant di e fundacion cu ta maneha tur asunto financiero.

Henter e operacion aki ta hole masha stinki. Merece investigacion pa haya claridad di Secrets Aruba.