Aceptacion pa Andin Bikker riba lista di MEP ta confrontando resistencia formal

Ainda no tin claridad si Minister demisionario Andin Bikker lo participa den eleccion di dia 25 di juni benidero, ya cu ainda tin negociacionnan tumando lugar cu partido MEP, pero for di propio seno di e partido, ta mustra cu e aceptacion pa Bikker subi lista di MEP, ta enfrentando hopi resistencia.

Mientras cu tempo ta bula bay y falta dos dia solamente pa luna di april caba, ta keda solamente 55 dia pa partido y politiconan hiba mensahe pa pueblo di kico nan kier haci y presenta nan programa di partido.

Despues di mañan 30 di april ta resta solamente seis dia pa partidonan presenta nan lista di candidato na Conseho Supremo Electoral, pues practicamente ta den e dianan aki un decision tin cu cay relaciona cu e futuro politico di Andin Bikker.

Desde cu el a dicidi di aleha su mes for di partido POR, p’e caso di placa di fraktiemedewerker di e partido blau, rumornan tabata insistente cu e lo subi lista di partido MEP, pero manera ya caba AWEMainta a publica anteriormente, ningun hende kier cede nan puesto riba lista pa duna Bikker esaki.

A existi pa un tempo e posibilidad cu Bikker lo a tuma e puesto 4 riba e lista over for di Dangui Oduber, kende lo a subi p’e puesto 3 cu tabata di keda vacante cu retiro di Chris Romero, pero desde e momento cu lider di MEP a dicidi di bay Gobernador y baha su Gobierno, e plan di Romero pa haya un posicion den San Nicolas Ports Authority NV, a cay na awa.

Como Gobierno demisionario tabata dificil pa logra haci e compania aki realidad loke a bruha tur e plan di Minister Romero, kende a haya su mes ta bin bek riba lista y crea algun situacion di incomodidad p’e lista geel.

Ya practicamente imposibel pa Bikker dicidi di reactiva su partido Democracia  Real cu tin cuater aña caba for di servicio y pa uni su mes na otro partidonan, ta mustra sumamente dificil.

Un union di partido RED di Ricardo Croes ta ‘out of the question’, mientras cu el a saca su mes for di e organisacion di partido POR, cual partido el a yuda lanta y forma hunto cu Otmar Oduber y Marisol Lopez Tromp.

Posibilidad pa bay partido MAS cu awor tin Marisol como lider, tambe ta imposibel mirando confrontacionan formal cu nan dos tabatin den Parlamento y tambe ora cu e propio Andin Bikker kende a bira lider suplente ora cu Otmar Oduber a retira, no ta permiti e union aki mas.

Sinembargo e problema mas grandi ta keda tempo, ya cu simplemente no tin mucho tempo pa haci algo concreto, pa hiba un campaña electoral manera mester ta y ya Bikker no tin ni mucho tampoco y tampoco mucho partido cu cual e lo por uni su mes na dje.