Conocido musico Sonny Hoo a bay laga nos

Dialuna anochi pa mas o menos 7:30 pm a drenta tristo noticia cu e conocido saxofonista, Hornwah “Sonny” Hoo, naci na Aruba, dia 12 di februari 1937, a fayece na su cas, despues di un lucha hopi cortico cu cancer.

Sonny a bay laga atras su seis yuinan, entre nan, Larry Hoo,kende cu tambe no ta un desconoci den mundo di farandula y ex-Alto Comisario di Polis Andrew Hoo.

Na aña 2019 a honra Sonny cu e Old Musicians Award di San Nicolas, pa su “outstanding musical performances”.

Sonny Hoo a traha na Aruba pa APA N.V., pa despues a haya un oferta na St. Maarten, pa guia operacionnan di haf di St. Maarten y despues a bolbe Aruba.

Un persona hopi dedica na bienestar y desaroyo di San Nicolas. El a dedica ultimo añanan, su experienca y experticio den San Nicolaas Business Association. Como musico el a compaña varios grupo musical, unda cu su morto lo laga un bashi atras. Condolencia na su famia y na tur musico cu e Perdida aki.