Gerente di kompleho Porto Cupecoy a gana kaso kontra e doñonan

PHILIPSBURG—E èx gerente di Porto Cupecoy Owners Association (PCOA) a gana e kaso sivil ku el a inisia kontra e asosiashon aña pasá januari despues ku el a bati alarma ku e asosiashon tabata paga e empleadonan di forma ilegal.

Siman pasá Korte a dikta sentensia i a kondená e asosiashon di doñonan di kas pa paga e gerente tur loke e tin derecho riba dje pa lei.

E gerente a bira ‘klokkenluider’ ora el a nota ku e asosiashon tabata paga empleadonan su salario kèsh ku plaka di casino.

E gerente a keda kontrata, pasobra e ta bendedó di kas profeshonal. No ta nada straño ku den e kaso aki e magnate di casino Francesco Corallo tabatin un patita metí meskos ku e tin den masha hopi kos na Sint Maarten.

E gerente a informá e asosiashon di doñonan di apartamento ku e no ta sintié konfortabel ku nan ta paga trahadornan asina pasobra e ta parse ku ta labamentu di plaka tin.

De hecho e asosiashon tabatin problema finansiero, pasobra nan no por a paga nan resibu di awa i koriente, ni seguro.

El a informa e asosiashon ku e ta dispuesto pa kore e risiko di daño konta su persona, pasobra e ta paga kèsh i mester awa i koriente i  e por deposita plaka kèsh tur dia tambe na banko basta ta menos ku 10.000 dòler pa dia.

Komo reakshon e asosiashon di doñonan a terminá nan kontrat ku e agensia di inmobilario i e gerente a keda na kaya.

Abogado Kim Huisman a defendé e gerente reklamando ku nan no a duna e gerente retiro di akuerdo ku lei laboral.

Korte a bai di akuerdo ku por tin kantidat di motibu pa kore ku e gerente, pero no por kita for di nan pensamentu ku ta pa motibu dje karta ku ta indiká labamentu di plaka, e homber a haña retiro.

Segun Hues ta pasobra e homber a bati alarma riba labamentu di plaka el a haña retiro i es a ordená e asosiashon di doñonan di residensia pa pag’e segun lei.