Lago Heights Naked Park, un joya di proyecto cu falta atencion

Na Aruba e cantidad di facilidad manera Lago Heights Naked Park como tambe Parke Jaburibari mihor conoci como Parke Curazon ta hopi limita. Awendia nos por wak cu desde oranan tempran di mainta e lugarnan aki ta wordo frecuenta dor di usarionan cu ta desea di move y mantene un curpa sano.

A pesar di tur esaki e usuarionan ta haña nan mes confronta cu diferente obstaculo o falta di mantencion. Recientemente por a mira con e diferente machinnan a haña un man di verf nobo, pero asina mes e frusto y unda tin daño ta keda visibel y por forma un peliger p’e usuario, segun Anchelino Vrolijk di partido POR.

Ademas por wak con e yerba a crece te cu ta stroba usuarionan di cana trankilo pasobra por tin cualkier bestia indesea presente. Mester pensa na entre otro un lisimbein (duizendpoot) o un scorpion y asina tin hopi mas cu por menciona.

Pesey mes como miembro di e comunidad di San Nicolas Anchelino Vrolijk kier a urgi Minister di Deporte y Salubridad, Dangui Oduber pa tuma cuenta cu esaki, y sigur lo ta na su lugar pa instrui e departamento concerni pa bin haci mantencion di e parke bunita aki cu ta situa na San Nicolas. Sin lubida cu e parke aki ta keda riba e caminda unda diariamente nos bishitanten ta pasa banda di dje y admira esaki. E lugar aki a wordo crea pa nos comunidad di San Nicolas pa haci movecion riba dje p’asina hiba un bida saludabel.