Belasting a kobra hòmber ku ta biba di plaka di su mama

WILLEMSTAD – Resientemente Korte den Promé Instansia na Kòrsou a koregi un situashon robes kaminda Belasting a kobra un homber belasting riba plaka ku su mama ta manda pe for di Alemania.

Promé ku kualke lesadó pensa duru ta ki ko’i sinbèrgwensa, e kos aki ta ku un mama mester manda sèn tur luna pa kria su yiu na Kòrsou, mester bisa ku no ta Belasting su falta, pasobra te homber mes a yena e formulario ku e montante riba kual el a kere ku e mester paga belasting.

Un hende mester a hala su atenshon ku e ta regalando Gobiernu plaka, pasobra el a bai Korte pa reklamá restitushon dje sèn ku el a paga sin tabatin mester.

I na final el a gana, pero ta su mes falta ku el a hañ’é den e labatiba aki.

Fin di 2018 Inspectie a manda aanslag pe paga NAf 3.322, NAf 215 en NAf 3.101 pe diferente tipo di prima fiskal i sosial.

Ta su siguiente aña dia 24 januari el a bin na tinu ku e no mester a paga e primanan, pero ora el a reklamá, Inspektor di Belasting kasi outomatikamente a rechasá su petishon i no a keda e siudadano nada otro sino di bai Korte Civil.

El a paga 50 heldu i Griffier a pone su kaso riba ròl pa luna pasá Hues disidi riba e kaso.

Pa motibu di Corona a tene e kaso via video sin ku e Inspektor a presentá, pero na final a manda un mensahe pa pidi Hues no sera e kaso. Hues a pone e petishon un banda.

Un siudadano ta paga prima pa tin seguro mediko, Penshun di Behes i otro seguronan sosial dependé kuantu e ta gana.

E siudadano ta dependé di su mama na Alemania pa kubri su gastunan diario. Pa luna e mama ta manda € 975 ku ta € 11.700.

Dia e siudadano a yena su formulario di belasting i el a yena 22.800 florin komo kontribushon di su mama komo entrada. Inspektor a basa su aanslag riba e datonan ku e siudadano mes a aportá, pero a lubida ku ni maske ta e siudadano mes a kometé e barbaridat di anota e kontribushon di su mama komo entrada, lei ta bisa ku si ta un famia di sanger linea rekta haci un donashon, no por kobr’é belasting riba e suma.