Cantidad grandi di Polis a drenta cas na Pindastraat, pa pone un hoben den boei

Diaranson anochi den careda di 9’or un cantidad di Polis a drenta un cas na Pindastraat. Tur esaki despues di tabata buscando un stationwagon color shinishi.

For di algun ora mas tempran tabatin un problema den Dakota, unda cu Polis a papia cu algun di e hobennan envolvi, e momento ey ningun hende a wordo deteni.

Pero mas anochi, Polis a haya informacion cu un di e hobennan conoci pa Polis lo ta den un stationwagon color shinishi. Esey no ta tur, a ser bisa cu e hoben conoci ey tin un arma di candela cu ne.

Esaki tabata motibo cu masha hopi Polis a drenta cas ora cu nan a topa cu e stationwagon para den Pindastraat. E hoben cu tabata wordo busca tabata den un cas cu ta conoci pa autoridad.

Ey nan por a scucha papiamento duro di tanto e habitantenan y di e Polisnan, cu a sali cu un hoben pone mey-mey caminda pa por a boei e.

Durante di e detencion tension a escala, gritamento y un cantidad grandi palabra sushi entre algun persona eynan mes.

Polis mesora a pidi pa transportwagen, mientras Polis a puntra e doño pa habri e Toyota stationwagon.

Polis a listra den cura di e cas, pero tampoco a haya nada particular. Na final nan a papia cu e conoci di nan Calbas y a splike riba e consecuencianan si problemanan continua.