CBS a publica Indice di Prijs di Consumo pa luna di maart 2021

E CPI pa luna di maart 2021 ta 97.59, loke ta representa un subida di 0.6% compara cu e indice di februari 2021 (97.00) y acumulando un subida di 0.5% te cu na maart di e aña aki.

E cambio di e CPI p’e ultimo diesdos (12) lunanan (Maart 2020 te cu Maart 2021) ta -1.1%, un caida di 1.8 punto di porcentahe (ppt) compara cu e periodo corespondiente di aña pasa (0.7%).

E promedio anual di e tasa di inflacion p’e periodo di maart 2020 te cu maart 2021 ta -2.3%, un caida di 5.9 ppt compara cu e 3.6% registra den e periodo di maart 2019 te cu maart 2020.

Durante e luna aki, cinco (5) di e diesdos (12) sectornan a registra subida di prijs. E subidanan cu tabata tin e mayor efecto riba e CPI a wordo registra p’e sectornan di “Mobilario” (4.4%) y “Transporte” (2.0%), causando un efecto di 0.40 y 0.25 ppt.

E subidanan den e restante sectornan a contribui cu un efecto di 0.12 ppt riba e CPI di maart 2021.

E subidanan aki a wordo contraresta parcialmente dor di caida den e indice di e sectornan di “Vivienda” (-0.2%) y “Cuminda y bebida no-alcoholico” (-0.3) cu a contribui cu un efecto di respectivamente -0.06 y -0.04 ppt riba e CPI di maart 2021. E caidanan den e restante sectornan a contribui cu un efecto di -0.06 ppt riba e CPI di maart 2021.

E subida den e sector di “Mobilario” a wordo causa dor di principalmente un subida di 14.1% den e categoria “Aparato pa uso domestico”, causando un efecto di 0.33 ppt.

E subida den e sector di “Transporte” a wordo causa dor di un subida di 3.5% den e categoria “Gasto relaciona cu uso di vehiculo di transporte personal”, causando un efecto di 0.26 ppt.

E caida den e sector di “Vivienda” a wordo causa principalmente dor di un caida den e categoria “Mantencion y reparacion di vivienda” (-1.1%), causando un efecto di -0.06 ppt.

E caida den e sector di “Cuminda y bebida no-alcoholico” a wordo causa dor di un caida 0.5% den e categoria “Cuminda”, causando un efecto di -0.04 ppt.