Di con lider di MEP a kita 12.5% di trahadornan publico

Gabinete Wever Croes como Gobierno no tin argumento pa hiba un campaña politico serio, pa trata di convence su votadornan, pa sigui sostene principalmente partido MEP.

Mientras cu AWEMainta pa practicamente cuater aña caba no ta haya ningun aviso di Gobierno of di partido MEP, por a tuma nota cu riba algun website liga n’e partido aki, a wordo publica un asina yama “aviso paga.”

E aviso ta un intento di partido MEP pa convence votadornan cu su Gobierno a hiba un maneho di finansa responsabel, pero caminda solamente ta menciona un asunto cu realmente ni nan mes ta kere.

Segun e aviso aki: “MEP a converti deficit di 444 miyon florin di aña 2012, den un surplus di 46 miyon na aña 2020” y mas abou riba e aviso paga aki, e partido ta manda un mensahe pa votadornan di “Cu Bo nos ta avansa.”

Lo tabata na su lugar pa partido MEP splica pueblo ta kende a avansa den pueblo cu Gabinete Wever Croes, ya cu tabata tres aña y mey di medida tras di medida, caminda poder di compra a bay atras den un forma nunca bisto, mientras cu Minister demisionario Xiomara Maduro, recientemente a sigura pueblo cu e medida di BTW caminda tur hende lo tin cu paga 12.5% ora cu nan haci compra, lo wordo introduci.

Pues partido MEP lo bandona Gobierno laganda ainda cantidad di medida cu tin cu wordo introduci y asina mes politiconan di e partido tin e curashi di bisa ‘cu bo nos ta avansa.’

Si enbardad e  mensahe politico aki ta berdad, ta bon pa lider di MEP, kende ta Prome Minister demisionario Evelyn Wever Croes, splica trahadornan publico di con nan mester a entrega 12.5% di nan salario y beneficionan dor di e pandemia.

Dicon Evelyn a firma un acuerdo cu Hulanda pa pasa finansa di e pais over pa Gobierno Hulandes na 2020 y ta bon bin Gobierno Hulandes a insisti pa CFT sigui controla Gobierno, sigur un Gobierno cu a logra un surplus di 46 miyon den presupuesto 2020?

Ta cosnan cu ta mustra riba locura, cu ta mustra bon cla cu partido MEP no tin nocion kico pa haci, con pa convence su votadornan pa sigui sostene politiconan di e partido y sigur di con un Gobierno cu ta papia di un surplues di 46 miyon, tin cu  kita remedi valioso pa miles di hende for di lista di AZV, hincando tur hende den un situacion hopi fastioso y hopi dificil. Pero manera e aviso ta mustra, cu ta un aviso paga ta partido MEP pues por pone tur locura cu nan ta kere lo yuda nan cu nan votadornan.