Gabinete Wever Croes a entrega mita di e pais na Hulanda. E otro mita ta wordo duna na ‘conclave’ di famia Croes y sostenedornan di partido

Gabinete Wever Croes ta demisionario, pero tin tur indicacion cu nificacion di e palabra demisionario ta conta solamente pa asuntonan general di e pais, mientras cu tin desaroyonan cu ta tumando lugar cu simplemente ta di condena.

E Gobierno aki a drenta un etapa caminda tur tres partido ta preparando pa eleccion di dia 25 di juni proximo y pa falta di argumento politico convincente pa votadornan, Gabinete Wever Croes ta bezig ta ‘ruim op de boel’ of loke por wordo considera como “shredder time.”

Na mes momento informacionnan ta drenta na AWEMainta cu mientras cu Gobierno ta demisionario caminda solamente asuntonan pendiente e por atende, tin cantidad di hende cu a drenta den servicio di Gobierno como coordinador, awor ta wordo nombra den varios  posicion vast, pues e hendenan aki lo no bay cas ora cu e Gobierno bay cas, pero esaki lo aumenta e gasto di personal di Gobierno.

Algo increibel cu lo bay tin consecuencianan serio pa henter e pais ora cu Gobierno Hulandes ripara e tipo di crimen aki, cometi pa un Gobierno cu simplemente a abusa di henter pueblo pa sirbi su propio hendenan.

Mientras cu Gabinete Wever Croes a dicidi di reduci salario di trahadornan publico y companianan estatal cu 12.5%  pa yuda otronan cu a  perde nan trabou cu Fase, e mesun Gobierno aki ta bira pone un set di famia y hendenan yega na famia Croes di Prome Minister, na trabou.

E ora si no ta papia di sacrificio, di convivencia cu ta exigi di trahadornan publico pa haci, ya cu ta bon conoci pa pueblo caba cuanto famia di tanto Prome Minister como Minister di Labor y Asuntonan Social, ta laborando den edificio di Cocolishi.

Aña pasa Prome Minister Evelyn Wever Croes a firma un acuerdo cu Hulanda, caminda practicamente a entrega mita di autonomia di pais Aruba na Hulanda, caminda entre otro ta Hulanda ta dicidi kico por y kico no por cu finansa di e pais.

Ta Hulanda ta bin manda awor riba tereno hudicial, den enseñansa y cantidad di otro asuntonan mas y ta tristo pa mira con easki a sosode caminda awor tur derecho adkeri c’un lucha cu a wordo hiba decadanan largo, ya no ta existi y por bisa cu tur frankesa cu Hulanda ta manda riba mita di pais Aruba.

Mirando e forma con Gabinete Wever Croes ta hibando su maneho, cu tur nombramentonan cu ta tumando lugar, por bisa cu e otro mita cu a resta di pais Aruba, ta wordo duna awor na un asina yama “conclave” di famia Croes y levemento di famia Oduber.

Trahadornan cu ta na cas sin trabou, hendenan cu ta wordo yuda pa medio di Rode Kruis, hendenan cu ta sperando bibando riba un suma bou di minimumloon, tin cu para mira awor con Gobierno di Prome Minister demisionario ta cuminsa acomoda su hendenan den servicio di Gobierno.

Esey t’e campaña di e partido MEP, sigura e votonan aki, mientras cu otronan tin cu sacrifica salario mientras cu otronan ta bibando bon.