Pa no tin aglomeracion, lo no tin parade ora di entrega di lista. Entrega di lista ta bay via e-mail

Pa entrega di lista di candidato e biaha aki lo tin cambio. E biaha ki lo bay a base di un email na un adres special banda di e entrega fisico. Mester bay cu un minimo di persona envolvi y segun cita atrobe pa evita cu tin un aglomeracion di persona cu por contribui n’e transmision di e virus.

Pa motibo cu e eleccion aki a tuma nos di sorpresa, riba e dianan cu e procesonan electoral mester tuma lugar ya caba tabatin citanan di por ehempel, casamento cu mester tuma lugar.

Pesey mester a organisa mas skerpi pa evita aglomeracion di hende cu atrobe ta trece transmision di e virus.

Despues cu entrega lista tin e proceso di sosten pa lista. E partidonan cu no a haya asiento den e ultimo eleccion mester haya sosten di 587 persona cu derecho di voto pa nan participa den eleccion. Mirando e cantidad di partidonan activo cu tin, Conseho Electoral ta premira cu lo mester mas of menos 4 mil firma.

Pa evita aglomeracion di 4 mil hende den un solo lugar lo ta parti den tres diferente lugar y lo ta organisa diferente pa evita cu diferente hende ta mishi cu e mesun obheto fisico.

Normalmente hende cu ta bin duna sosten ta skirbi riba e mesun formulario te ora cu ta yena n’e cantidad necesario di sosten. Conseho Electoral y Censo ta haci uzo di e sistema Ondersteuningverkiezings Aruba pa verifica si e persona tin derecho di voto p’e por sostene un lista. E sistema tambe ta registra si e persona a haci uzo di su derecho pa evita cu un persona por sostene mas di un partido, of mas di un biaha.

Ley ta bisa cu e por sostene solamente un partido, un solo biaha. Un formulario pa cada persona yena y deposita den un buzon presente n’e lugar p’e partido cu e ta sostene. Asina despues por controla si ta necesario.