Prome Minister no ta permiti ningun ‘ter beschikking’, pero no a manda ningun trahador ‘ter beschikking’ tres aña caba cas

Diabierna siman pasa Prome Minister demisionario Evelyn Wever Croes, a duna un declaracion cu su persona y ningun otro Minister cu a resta den su Gabinete, lo tin trahadornan publico, den e posicion di ‘ter beschikking’ pa campaña.

Evelyn a mustra cu e tin dos Ministerio bou su responsabilidad cu t’esun di asuntonan general y esun di infrastructura cu tabata di Minister Marisol Lopez Tromp y cu e no tin ningun hende ter beschikking.

Na mes momento e lider di MEP a informa cu Conseho di Minister a tuma e decision cu ningun otro Minister lo tuma ambtenaarnan ter beschikking pa campaña loke ta ser cuestiona mirando e actividadnan cu tin rond di e politiconan di MEP y na mes momento a trata di gana punto politico, mustrando cu Mike Eman lider di AVP, lo tabatin mas cu 100 hende ter beschikking den eleccion di 2017.

Den e aspecto aki tin cu menciona cu e hendenan aki na cual Evelyn ta referi na dje, pa 4 aña largo a yuda den e proyecto di ‘Bo Bario’ caminda te dia di awe ainda por mira resultado di e trabou aki cu a wordo haci pa drecha barionan rond e isla.

Awe Prome Minister aki no por duna indicacion di un solo bario cu su Gobierno a yuda drecha, a yuda limpia p’asina pueblo bon biba den un ambiente mas positivo.

Loke sin duda ta interesante den e declaracion di Prome Minister, ta cu e kier duna un impresion cu  su Gobierno lo no crea mas gasto pa Gobierno, mientras cu en realidad ya caba e gastonan aki a ser haci dia bieu caba, mirando cuanto hende e tin rond di dje y tur e otro Ministernan tin den servicio como coordinadonan den edificio di Cocolishi.

Normalmente un coordinador cu tin un contract cu tin duracion pa mesun periodo cu e Gobierno ta na mando, den e caso aki e Gobierno di Evelyn Wever Croes a wordo manda cas dor di su persona y si realmente Evelyn kier hunga hende bon, mustra su integridad, e coordinadornan aki TUR mester a bay cas riba mesun dia cu el a baha su Gobierno.

Esey no a sosode y loke ta pasando aworaki, ta cu tur e hendenan aki, practicamente ta TER BESCHIKKING di su persona y di e otro Ministernan, pues  e payasada di bin hunga interesante awor, no ta cuadra cu e realidad di e situacion, ya cu su Gobierno ta sigui draai y den e caso aki draai kiermen haci campaña pa partido, cu e hendenan aki cu por wordo califica cu nan ta na disposicion di e Ministernan,  incluso su persona.

Segun Prome Minister mr. Evelyn Wever-Croes, e no tin ningun hende ter beschikking ni pa campaña, ni pa ta riba lista. E personanan trahando cune den su Ministerio ta trahando den crisis. Tin dos Ministerio pa atende cual ta Ministerio di Infrastructura y Ministerio di Asuntonan General, fuera di e crisis.

Pero no tin ningun hende cu a bin adicional pa campaña. A tuma decision den Ministerraad cu ningun ambtenaar ta bay ta poni ter beschikking pa campaña pa ningun Minister. Esey tabata un practica cuater aña pasa cu tabatin por lo menos 100 ambtenaar poni ter beschikking di politiconan pa campaña pa partido AVP cu tabata den Gobierno. No ta bay haci esey, segun e mandatario.

El a agrega cu den e raport cu Conseho Supremo Electoral a traha, por a lesa con ex-Minister Mike Eman tabata mete den e proceso electoral. Con ex-Minister Arthur Dowers tabata mete den dje. Con un candidato riba lista di AVP den e proceso electoral. Esey ta para den e documento y ta publico entrega na Parlamento. Tur hende por les’e.

Pa loke ta agente Molina, e mandatario no ta kere cu el a entrega su retiro como Polis. E ta trahando ainda. Awor si e pregunta cu el a bay ter beschikking pa campaña, e mandatario a contesta cu no. Ningun hende lo ta ter beschikking pa campaña den e nuebe simannan cu ta bin.