Roberto Croes a cumpli 43 aniversario den servicio di Gobierno

Cu un trayectoria impresionante cumpliendo cu su trabou diariamente. Nos ta papiando aki di nos nos colega sr. Roberto Croes cariñosamente yama “Robby”

cu recientemente a cumpli 43 aña den servicio di Gobierno. Un persona cu por contabo historia di Santa Rosa completamente for di cabez. Kico cu bo por tin duda aden, mester corda puntra “Robby” paso sigur e tin un contesta pabo.

Aki ta sigui un tiki di e historia laboral di sr. Roberto Croes.

Robby a cuminsa su carera como empleado publico na Departamento di Agricultura, Cria y Pesca Santa Rosa for di 21 di februari aña 1978 den e rango di Aankomend Vakman.

Robby a cuminsa labora den e seccion di mantencion/criansa. Asina sr. Roberto Croes a continua cu su labornan durante e tempo ey y asina tambe ta yega na remarke pa haya diferente promocion.

Na aña 1978 a yega na su prome promocion cu ta “Onder Opzighter C”. Na 1979 “Onder Opzichter B”. 1982 “Onder Opzichter 3de Klasse Ambtenaar. 1983 Onder Opzichter 2de Klasse. 1984 Vaste Pensioen Gerechtigde Dienst” 1986 “Onder Opzichter 1ste Klasse”. 1989 “Adjunct-Commies” . 1996 “Adjunct-Commies 1ste Klasse. 2008 “Commies”. 2012 “Commies 1ste Klasse y aña 2014 Hoofd Commies.

Den transcurso di añanan “Robby” tambe a ocupa diferente funcion den nos Departamento di Agriculturra, Cria y Pesca Santa Rosa manera e.o. 1978-1989 Hefe Suplente di seccion di Criansa; 1989-1996 Hefe seccion Magazijn; 1996-2012 Planning Voorlighting en Educatie; 2012-1021 Beleidmedewerker.

Aki bo por comproba cu “Robby” tin amplio experencia den diferente trabou y funcion. Un persona masha cordial y semper dispuesto pa yuda. Cumpliedo cu su labor di tur dia manera mester ta.

N’e ocasion aki Minister encarga cu Sector Primario, Chris Romero tabata presenta pa felicita sr. Roberto Croes cu su 43 aña di servicio.

For di Minister sr. Chris Romero el a ricibi su certificado di aprecio y un bunita regalo den presencia di nos Directora sra. Nathalie Maduro. Despues a sigui un celebracion chikito hunto cu Minster Chris Romero y demas coleganan di Santa Rosa.

Dia 9 di juli proximo colega sr. Roberto Croes lo baha cu pensioen oficalmente despues di a labora 43 aña aki na Departamento di Agricultura, Cria y Pesca Santa Rosa.

Ministerio di Telecomunicacion y Transporte y Sector Primario hunto cu su Minister sr.Chris Romero, Staf y Personal di Departamento di Agricultura, Cria y Pesca Santa Rosa ta desea “Robby” tur clase di exito y disfruta awor dibo pensioen bon mereci.