Waf di Barcadera – ASTEC y Douane ta extende oranan di servicio na Main Gate

ASTEC ta anuncia cu for di dialuna dia 3 di mei 2021, e orario di servicio na Main Gate na waf di Barcadera lo cambio y adapta di 7:30 am – 4:30 pm non stop di dialuna pa diabierna.

Sr. Mike de l’Isle, Gerente/CEO di ASTEC N.V. ta comenta: “E expansion di nos orarionan di servicio na Main Gate di nos waf na Barcadera ta debi n’e necesidadnan di nos clientenan pa mas flexibilidad pa atende cu asuntonan di containers.

Nos ta masha contento cu e cooperacion di Douane y tur empleado envolvi pa duna e servicio durante e orarionan extendi pa atende cu containers na Main Gate y nos ta mira padilanti pa un transicion exitoso cu tur partido envolvi”.

Sr. Roderick Croes, Director di Douane ta relata: “Den e cuadro di facilita comercio, Douane ta haci uso di e oportunidad pa, conhuntamente cu ASTEC, haci e cambio di orario di servicio posibel na Main Gate di Waf di Carga na Barcadera. Cu e expansion di orarionan di servicio, e clientenan ta haña mas espacio pa saca nan container cu carga y asina comunidad Aruba por tin productonan mas liher na nan disposicion”.

Pa mas informacion tocante e relato di prensa aki por tuma contacto cu ASTEC Administracion na 582-2558.