Desde 1 di mei no mester paga pa remedinan mas

Den su discurso nacional diabierna 30 di april anochi, Prome Minister Evelyn Wever-Croes a menciona e retonan di tur dia cu Gobierno y Aruba ta enfrentando desde comienso di Pandemia di Covid 19. Gabinete Wever-Croes ta trahando duro riba tur otro reto cu bin den caminda.

Un di e retonan aki sigur t’e condicion cu Hulanda a pone pa corta 5 miyon den gasto di AZV tur luna. Gobierno di Aruba no ta acepta e condicion ey y p’esey a institui un comision nacional di e sector medico, pa bin cu un proposicion con por baha gastonan medico na forma responsabel. Mientras cu e comision aki ta deliberando, Gobierno no ta corta 5 miyon tur luna pero un suma mas abou.

Como Gobierno a purba di tur forma pa convence Hulanda cu corta 5 miyon tur luna no ta posibel. Sinembargo Hulanda ta keda para riba e condicion cu MESTER corta 5 miyon tur luna, 60 miyon pa aña, sino Aruba no ta haya e sosten di likides pa paga pa cuido di salud, siguridad, enseñansa na Aruba of pa subsidio di salario.

Pa sali di e impase aki, Gobierno a pidi un comision nacional pa bin cu proposicionnan. E proposicionnan aki, Prome Minister a remarca, Gobierno lo ricibi pronto.

Un otro reto grandi ta e cambio den maneho di AZV cu desde 1 di april ta cobra pa cierto remedinan, e asina yama “positieve lijst”. Gobierno a wordo acerca pa hopi persona, cu ta biba di bijstand of Fase, of pensioen. Gobierno a scucha e dolornan den comunidad pa cua motibo tambe Conseho di Minister a tuma e decision di cambia e maneho aki y pueblo no mester paga p’e remedinan aki mas.

“Nos ta sinti cu e maneho aki no a wordo suficientemente prepara y cu no a tene cuenta cu e impacto negativo riba hopi patient cu no por a paga nan remedinan. Nos a pidi AZV y e Comision cu ta conseha Gobierno riba remedi, pa studia e maneho aki mihor y mientras tanto ta elimina e decision aki”, Prome Minister a enfatisa.

Pues entrante 1 di mei, e maneho di “positieve lijst” ta keda elimina y e situacion ta bira mescos cu e tabata prome cu 1 di april: cu no mester paga pa e remedinan aki. Cu esaki Gobierno ta trece bek trankilidad den nos comunidad, especialmente esnan mas vulnerable.

“Asina nos ta sigui traha pa soluciona cada reto cu crusa nos caminda. Cu curashi, cu balentia, cu curason. Mi kier gradici bo pa bo comprension, pa bo sosten, pa bo oracionnan, consehonan y palabranan di encurashamento. Tur ta yuda duna nos forsa y animo cada dia.

E final di e Pandemia ta na bista, y ta mi deseo pa saca Aruba di e pandemia, y pone Aruba riba e caminda di recuperacion economico y bienestar social. Pero mi no por haci’e mi so. Nos Gobierno no por haci’e nos so. Hunto y cu e bendicion di Dios nos por logr’e”, Prome Minister Evelyn Wever-Croes a termina bisando.