Dia ta yegando pa pueblo conoce tur e politiconan sea tradicional o nobo cu a pone nan mes na servicio di nos pais

Pa. Atan Lee Sr.

Un siman crucial pa pueblo conoce cu futuro sirbidornan. Cu lo entrega nan mes cu alma, mente, curazon y principalmente cu VOCACION. ESTA SIGUI E YAMADA DI NOS CREADOR. Kico esaki tin di haci cu Dios, hopi, debi dia cu nan tuma nan posicion nan ta hura o priminti den nomber di Dios, segun nos constitucion cu nan lo bai haci nan trabao, segun Su mandamentonan.

Ya tin basta profesionalnan a publica cu nan ta cla pa sirbi nos pueblo, cual a yena mi cu hopi sastifacion, pasobra ta tempo pa stop di para un banda y critica y critica, pero cu miedo y corbadia pa pone nan mes na servicio di nos comunidad. Tin di nan cu a haci’e den un forma grandi yen di fanfaria, pagando hopi pa grabacion etc. Den un tempo na unda nos pais ta pasando den su peor momento di historia. Pober y cu hendenan hopi pober, tur e placa aki por a ser duna na instancianan cu ta traha cu e pobernan.

Dios lo a keda mas contento. Tur e banderanan, sticker, borchi cu ya ta riba mercado, apenas algun dia cu a ser anuncia cu lo bai tin un eleccion prome cu tempo, ta placanan cu por a ser regala na pobernan. Pueblo tuma nan y benda nan afor despues cu un menosprecio grandi. Mi admiracion na tur partido cu lo bai campaña sin articulonan pa cumpra nos pueblo. Ni se compra ni se vende.

Te awor e partidonan chikito entre parentesis cu a presenta nan candidatonan, partido RAIZ a demostra di tin un lista di profesionalnan bon balansa y ta cla pa representa pueblo den Parlamento y como Gobernantenan. Ban wak con e lista di e otronan lo bai ta.

Den partidonan grandi ya tin pelea y discusion pa number riba lista, tur tumando na consideracion mal ehempel di e grandinan cu te ainda pa decadanan ta dirigi e partidonan grandi tras di cortina, na unda abuso di poder a tuma lugar na prome lugar fabornan na famia y amigo. Cu tin den nan historia listanan di hendenan cu a comete fraude, corupcion y ladronicia. E nobonan kisas tambe lo ta desea di ricibi un tiki poder pa sigui cu esaki? Rumannan tras di cortina ta cierto hende ta sigui dirigi e partidonan aki. Nan ta goza di un pensioen miyonario y overbruggingstoelge miyonario y ainda nan kier mas.

E politico cu merece mi respet, kende pafor di Parlamento a hiba un tremendo oposicion ta drs. Booshi Wever. Un politico honesto y digno cu merece confiansa di pueblo. Cuanto denuncia e a haci cu poco poco ta conoce e luz di berdad. El a renuncia su pensioen miyonario pe sigui sirbi su pueblo. Otro cu a pasa den tur partido cu alfin lo conoce su fin politico como lider. Si den 3 partido bo no por a funciona, anto algo ta fout cu bo señora. No papia di honestidad, debi cu bo a vota pa tur e proyectonan bao investigacion, cu bo lider di POR a bin cu nan y cu mester a haya aprobacion di Parlamento. Incinerator cu a costa miyones ta para putri, placa di pueblo. Un Serlimar bancarota, contal a cumplace amigonan cu fabornan. Un radar cu no ta funciona, un pais yena cu ilegal, droga, atraco, asesinato y arma.

Ban spera cu nos lo conoce politiconan nobo cu si kier traha honestmente pa nos pueblo, sin presion di e bieunan. Hopi di e bieunan ta sigui riba lista cu e unico proposito traha te ora nan por cobra nan pensioen. Anto riba dje cu un posicion supuestamente eligible.