Fiskal a pidi pena di bida largu pa asesino di yu’i Kòrsou

LIMBURG – Siman pasá djabierne un tribunal penal na Limburg a pidi kastigu di bida largu pa un homber Kurasoleño di 52 aña, kende a mata un muhé tambe Kurasoleño aña pasá 22 di yuli ne siudat Hulandes Kerkrade.

Un tempu e homber tabata kompañero di bida di e dama Reagan Perez, pero e dama a kibra e relashon i for di e momento ei su bida tabata  na peliger.

El a hasi denunsia kantidat di biaha na Polis, pero lamentablemente mester bisa ku Polis Hulandes praktikamente no ta aktua riba denunsianan di menasa a menos ku nan pone morto dje viktima riba stupi di warda di Polis.

Ta masha hopi biaha e dama Perez, kende tabatin dos yu, a bati na porta di Warda di Polis pa pidi protekshon, pero e biahanan ku Polis a bai, ya e abusador a hui.

Riba e malogrado dia enkuestion, e asesino Roberto H., di 54 aña a inventá un triki pa sospendé Perez den su kas.

El a pidi un amigu pa bai hasi un pedido di bolo serka Perez i ora e amigu a drenta e kas, el a drenta rapidamente su tras i a kuminsa puñalá e viktima manera un karnisero.

El a kaba di kumpra e kuchú e mesun mainta ei den un karniseria dje barku pidiendo un kuchú grandi pasobra “ta hopi karni mi tin ku kòrta….’

Pa koinsidensia un Polis na sivil ku tabata di bishita serka un otro habitante dje kaya, nèt a mira Perez na kareda sali for di e kas ku e asesino puñalando e viktima.

Tabatin basta testigu ku a presensia e asesinato i danki ne hecho ku nan a filma i saka foto dje asesino, a logra aresté rapidamente.

E ta detené for aña pasá i djabierne ultimo su kaso a bai dilanti i aki dos siman Hues lo dikta sentensia.

E famianan a pidi pa duné pena di  morto, pero esei no ta eksisti mas den lei penal na Hulanda i asina a surgi un situashon ironiko kaminda pa dos asesinato ku e homber a kometé, el a haña garantia di bida largu solamente ku ta den prizon.