Na Barceló, Polis mester a atende cu un turista cu a bira agresivo, despues cu su mama a fayece den su kamber di hotel

Diasabra algo despues di 10’or y mey di anochi, presencia di ambulance a wordo pidi cu urgencia na Hotel Barceló pa un señora cu no lo ta dunando señal di bida.

Na yegada e paramédiconan di ambulance a haya nan confronta cu un situacion hopi tenso, un homber a lanta cu e paramediconan y tambe cu personal di e hotel. Mesora e hotel a pidi asistencia di Polis.

Varios unidad di Polis di Strand y di districto di Noord a yega na hotel Barceló, p’asina trata na controla e situacion cu lo tabata bayendo for di man. Polis a subi n’e piso caminda e turistanan ta hospeda y a detene un persona cu no kier a rasona.

Transportwagen di districto di Noord a presenta n’e hotel, cu e intencion di transporta e persona pa warda di Polis.

E homber a wordo hinca den transport, pero despues cu Polisnan a papia cu e homber, el a calma, tambe e homber a splica Polis cu ta su mama a fayece.

Despues el a pidinan hopi despensa p’e forma agresivo cu el a expresa su tristesa na momento cu el a ripara cu su mama a fayece.

E agentenan n’e sitio a duna e homber condolencia y e homber na su turno a brasa e Polisnan cu sigur n’e momento ey, sigur lo a sirbi pa un poco consuelo.

E homber tabata yora su mama inconsolabelmente. Leu di su famianan anto un vacación cu lo mester tabata pa relaha y disfruta den compania di su kerida mama, a caba den un tristesa inmenso.

Den careda di 11’or y 20 di anochi, dokter a presenta n’e sitio, pa constata morto di e señora, tambe un rato despues, Slachtofferhulp tambe a yega na Hotel Barceló, p’asina asisti e famia den su tristeza. Un funeral home a busca e curpa den careda di 12:30 a.m.