Presidente Conseho Supremo Electoral, Glenn Thode ta confirma: Awor kier impone algo cu no a wordo regla den tres aña y mey

Presidente di Conseho Supremo Electoral, drs. Glenn Thode diabierna ultimo a mustra cu  ta for di despues di eleccion 2017, a discuti e asunto di introduci cierto tecnologia mirando e presion cu personanan cu ta trahando na urnanan lectoral, ta pasa aden.

Na mes momento e propio Presidente Thode a mustra cu cu adaptracion di leynan necesario p’e sistema di votacion ta den un fase avansa, pero cu nan no ta cla ainda pa wordo introduci.

Segun sr. Thode su persona mes no a haya oportunidad pa dicidi si e ta keda den e funcion, pero mirando e ultimo desaroyonan, e decision aki tampoco por a wordo tuma.

El a sigura y enfatisa cu aunke ta bay haci uso di  scanner pa scan e stembiljetnan, e resultado di e conteo manual t’e resultado final di eleccion, pues e resultado di e scanner ta un resultado preliminar y tambe a splica cu despues di e eleccion di 2017 a haya diferente sugerencia pa bin cu mehoracionnan, pa cual a hinca esaki den un memo na 2019 caba.

Banda di esaki, e otro motibo di bin cu cierto cambio tecnologico ta pa evita mas tanto posibel plamamento di e virus mustrando cu despues di eleccion di 2017 caba esnan encarga na Aruba,  a bishita otro paisnan pa studia e sistema cu nan a usa pa nan proceso electoral.

Segun e presidente di e conseho, pa eleccion 2021 lo tin 70 urna, ademas di esnan special na e.o. KIA y Hospital, pues lo tin 8 urna nobo y na cada urna, lo por vota rond di 1000 persona.

IDENTIDAD

E otro dos cambionan cu tin den e sistema di votacion e biaha aki ta control di ID y voto cu ta bay wordo gescan caminda tur carchi di voto ta bin cu un QR-code.

E presidente di e urna mester haci e controlnan dor di yega menos posibel den contacto cu e votadornan, caminda  ta scan e QR-code y ta mira si e datonan den e mashin ta cuadra cu loke tin riba e carchi di voto y e ID.

Despues di e proceso aki, ta entrega e ciudadano un stembiljet y despues cu e bay den e hoki y deposita su voto, manera semper, e ta dobla e formulario y cana bay na e mashin di scan.

Eynan e ta habri e formulario y pone boca’bou den e mashin. Despues e ta cera e formulario y deposita esaki den e buzon.

E stembiljet no tin ningun number riba dje cu por registra esaki  na momento di scan pa wak kico cada persona vota y na final di anochi, e scanner, cu ta lease, ta saca un formulario cu ta bisa cuanto voto cada partido y candidato a haya y cuanto voto ta valido.

Esaki e ora lo bira e resultado preliminar.

Ya caba cu menos presion,  e miembronan di e urna ta bay cuminsa cu e conteo manual y si ta match, e trabou ta keda te ey, de lo contrario lo haci un otro conteo caminda e conteo manual lo t’e resultado oficial.

Tambe el a bisa cu e uso di scanner ta tuma lugar si e cuadra cu e stembiljet y esaki ta depende di e cantidad di partidonan cu lo participa.

Thode tambe a mustra cu  cada partido cu kier participa den e eleccion parlamentario mester haya 587 voto di sosten, si nan no tin asiento den Parlamento.

Mirando e partidonan cu a mustra interesa pa participa den eleccion, e lo nifica cu mester ricibi rond di 4 mil firma p’e partidonan aki por participa y pa evita aglomeracion, ta bay habri tres diferente centro, unda por bay firma pa e partido cu e personanan kier yuda. E firmante mester ta personanan cu tin derecho di voto. Entrega di lista tambe lo ta diferente ya cu partidonan lo por entrega esaki via di e-mail mietnras cu e otro opcion ta pa entrega esaki personalmente dor di cada lider di partido, na unda tin cu corda cu ta limita e cantidad di persona presente p’e ocasion ey.