Sostene nos communidad awor cu Kiwanis “5 for KIDS” !

E pandemia di Covid-19 ta sigi tin su impacto riba nos comunidad y diabierna dia 30 di april 2021 Kiwanis Club of Palm Beach a lanza e campaña “5 for KIDS”, pa recauda fondo y sigui duna aporte na nos comunidad, especialmente muchanan den necesidad.

Aña 2020 y 2021 a wordo grandemente afecta pa Covid-19. Mayoria organizacionan boluntario na Aruba, incluyendo Kiwanis Palm Beach, mester a reinventa nan mes p’asina por sigui funciona y cumpli cu nan metanan proponi.

Den e cuadro aki e campaña actual, “5 for KIDS”, ta uno inovativo: simplemente manda un SMS, cu text 5ForKids,  for di bo telefon celular p’e number 250 riba Digicel of SETAR pa haci un donacion di 5 florin!

Tur esnan cu ta contribui lo participa automaticamente na un sorteo semanal cu premionan fabuloso! E premionan aki ta varia di cena pa dos persona te na estadia den hotelnan local y otro articulonan exclusivo.

Tur fondo recauda lo wordo dedica na donacion of proyecto social den nos comunidad cu enfoque riba muchanan den necesidad. Ehempel di proyectonan ehecuta dor di Kiwanis Club of Palm Beach ta inclui e proyecto di Watercoolers pa Skolnan, Child Seat camapigns, ademas di donacionnan na un variacion di fundacionnan manera Cede Aruba, Hungateca, YMCA, Casa Cuna y mas.

Kiwanis Club of Palm Beach Aruba ta haci un apelacion na tur esnan cu ta den capacidad pa yuda, pa contribui awor na “5 for KIDS” y participa den e sorteonan! Simplemente manda for di bo telefon cellular un SMS, cu text 5ForKids, pa number 250. Esaki ta valido tanto pa clientenan di Digicel of SETAR. Ta posibel pa manda multiple SMS.

Tin e posibilidad ademas di haci e donativo via Pay.aw. Riba e website www.kiwanispalmbeach.com y riba Kiwanis Club of Palm Beach su facebook page lo por ser mira e QR code necesario pa haci e donacion aki. Y aki tambe tin e opcion di haci esaki mas di un biaha. E  campaña di “5 For Kids” lo core pa henter luna di mei.