Benjamin Romero ta presenta su di tres buki: E virus misterioso

Autor Benjamin Romero ta publica su di tres buki, titula: ‘E virus misterioso’. Un obra manera Benjamin mes ta bisa “cerca di su curason” y cu ta nifica hopi p’e autor.

Un obra cu un tema actual, e ta trata un topico cu nos tur ta bibando aden. E pandemia cu ta trece reto pa mundo.

Diferente topico di e desaroyonan di e pandemia ta bin na ordo. E autor ta explora tambe e parti humano, bon y menos bon, pa medio di e personahenan. Tambe moralidad y otro balornan ta puntonan cu e ta trece padilanti.

Benjamin Romero a tuma un aña di tempo pa traha riba e obra aki siguiendo e desaroyonan di e pandemia y e reaccion di e individuo como tambe di e comunidad. Romero ta caracterisa su publicacion mas recien como un novela cortico cu tin su dimension di ficcion, pero como cu e ta un periodista e tin tambe partinan realistico y tin bes e dos estilonan aki ta mezcla den otro.

Sr. Romero a entrega 2 ehemplar di ‘E virus misterioso’ na Directora di Biblioteca Nacional Aruba, sra. Astrid Britten p’e coleccion nacional. Biblioteca lo busca mas ehemplar p’e tin disponibel pa prestamo na publico.

Biografia cortico

Benjamin Romero a nace na Aruba dia 9 di mei 1963. El a realisa su estudio escolar y universitario na Colombia, pais di origen di su mayornan. El a gradua como Comunicador Social y Periodista na Universidad de La Sabana na Santa Fe de Bogotá, Colombia.  

Despues cu el a gradua, Benjamin a establece su mes na su isla natal, unda e tin mas cu 25 aña trahando den prensa. Actualmente e autor ta traha como periodista y den redacion di e corant Bon Dia Aruba.

Na aña 2016 Benjamin a publica su prome buki, ‘E Negoshi di Koffie na Aruba’, cu a bira un bestseller. A imprimi dos edicion di e obra aki na Papiamento y un version na Ingles [Titel na ingles). ‘E Caya di Monche’ ta titulo di su di dos buki, dedica na e linguista Ramon Todd Dandaré den cuadro di Aña di Papiamento 2018.

E obra aki na Papiamento tambe tin dos. Ambos ta obtenibel na biblioteca.

Fecha di e publicacion nobo aki ta april 2021, cu ISBN 978-99904-69-76-9 (103 pagina). Linguista sr. Ramon Todd Dandaré Mag. Ling a haci coreccion.

Benjamin Romero lo duna diferente presentacion di su buki den e proximo dianan. E buki ta na benta na libreria Van Dorp.